മുക്കം: ജലമെന്ന അമൂല്യ സമ്പത്ത് സംരക്ഷിക്കുന്ന പ്രവര്‍ത്തനങ്ങള്‍ ഇക്കൊല്ലത്തെ പ്രധാന ഊന്നലായിരിക്കുമെന്ന് കുന്ദമംഗലം ബി.ആര്‍.സി.യിലെ സാമൂഹികശാസ്ത്ര അധ്യാപകര്‍. മുക്കം മുനിസിപ്പാലിറ്റി, കാരശ്ശേരി, കൂടരഞ്ഞി, തിരുവമ്പാടി, കുന്ദമംഗലം പഞ്ചായത്തുകളിലെ സാമൂഹിക ശാസ്ത്രാധ്യാപകരുടെ വേനലവധിക്കാല പരിശീലനക്കളരിയിലാണ് ജലസംരക്ഷണത്തിന്റെ സമകാലിക സാമൂഹ്യ പ്രസക്തിയെക്കുറിച്ച് ചര്‍ച്ച നടന്നതും തുടര്‍പ്രവര്‍ത്തനങ്ങള്‍ ഏറ്റെടുത്തതും.
പരിശീലനത്തിന്റെ ഭാഗമായി ദക്ഷിണേന്ത്യയിലെ പ്രധാന ജല ഗവേഷണ കേന്ദ്രമായ കുന്ദമംഗലത്തെ സി.ഡബ്ല്യു.ആര്‍.ഡി.എം സന്ദര്‍ശിക്കുകയും ശാസ്ത്രജ്ഞരുമായി സംവദിക്കുകയും ചെയ്തു. ശാസ്ത്രജ്ഞരായ ഡോ. മാധവന്‍ കോമത്ത്, പ്രസന്നകുമാര്‍ എന്നിവരുമായി പദ്ധതികള്‍ ചര്‍ച്ച ചെയ്യുകയും ജലസംരക്ഷണ പ്രവര്‍ത്തനങ്ങളുടെ രൂപരേഖ തയാറാക്കുകയും ചെയ്തു. പ്രാഥമികമായി എല്ലാ വിദ്യാലയങ്ങളിലെയും കുടിവെള്ളം ലബോറട്ടറി പരിശോധനക്കായി സി.ഡബ്ല്യു.ആര്‍.ഡി.എമ്മിലേക്കെത്തിക്കാന്‍ ധാരണയായി.
ഒപ്പം വിദ്യാര്‍ഥികള്‍ക്ക് ഫീല്‍ഡ് ട്രിപ്പിനുള്ള സൗകര്യവും ഒരുക്കാമെന്ന് ഡയറക്ടര്‍ ഉറപ്പു നല്‍കിയതായും അധ്യാപകര്‍ പറഞ്ഞു. വിദ്യാലയങ്ങളില്‍ ജലസംരക്ഷണ സന്ദേശം പ്രചരിപ്പിക്കാന്‍ സാമൂഹ്യശാസ്ത്ര മ്യൂസിയം ആരംഭിക്കാനും ആലോചനയുണ്ട്. സി.ഡബ്ലിയു.ആര്‍.ഡി.എമ്മിലെ ജല മ്യൂസിയം, നക്ഷത്ര വനങ്ങള്‍, മഴവെള്ള സംഭരണികള്‍, പൂന്തോട്ടം, ലാബുകള്‍, ലൈബ്രറി എന്നിവയും സംഘം സന്ദര്‍ശിച്ചു. ഒപ്പം കുന്ദമംഗലം എ.യു.പി സ്‌കൂള്‍ അധ്യാപകന്‍ ഏകനാഥന്റെ അമൂല്യ പുരാവസ്തു ശേഖരങ്ങളുടെ പ്രദര്‍ശനവും സംവാദവും സംഘടിപ്പിച്ചു. നാലു ദിവസമായി തൊണ്ടിമ്മല്‍ ജി.എല്‍.പി.സ്‌കൂളില്‍ നടന്ന സാമൂഹിക ശാസ്ത്രാധ്യാപകരുടെ പരിശീലനത്തില്‍ പഠനോപകരണ നിര്‍മാണം, ലഘു പരീക്ഷണം, പാനല്‍ ചര്‍ച്ച, ഡോക്യുമെന്ററി നിര്‍മാണം തുടങ്ങിയവയും ഉണ്ടായിരുന്നു. വി. അജീഷ്, സുധീര്‍ ബാബു, രമാദേവി, ബി.ആര്‍.സി ട്രെയ്‌നര്‍ ശശികുമാര്‍, ബബിഷ നേതൃത്വം നല്‍കി.