റിയാദ്: കൊവിഡ് -19 വൈറസ് വ്യാപനം തടയുന്നതിന്റെ ഭാഗമായി രാജ്യത്ത് ഏർപ്പെടുത്തിയ കർഫ്യു ലംഘിക്കുന്നവർക്ക് കനത്ത ശിക്ഷ. വാഹനത്തിൽ കർഫ്യു ലംഘിക്കുകയാണെങ്കിൽ ഡ്രൈവർക്ക് മാത്രമല്ല വാഹനത്തിലെ മുഴുവൻ യാത്രികർക്കും ശിക്ഷ ബാധകമാണെന്ന് അധികൃതർ വ്യക്തമാക്കി. സഊദി പൊതുസുരക്ഷാ വകുപ്പാണ് ഇക്കാര്യം വ്യക്തമാക്കിയത്. കര്‍ഫ്യൂ ലംഘകർക്ക് ആദ്യ തവണ 10,000 റിയാല്‍ വീതം പിഴയാണ് ലഭിക്കുക. നിയമ ലംഘനം ആവര്‍ത്തിക്കുന്നവര്‍ക്ക് ഇരട്ടി തുകയും മൂന്നാമതും നിയമ ലംഘനം നടത്തി പിടിയിലാകുന്നവർക്ക് 20 ദിവസത്തില്‍ കവിയാത്ത തടവു ശിക്ഷയും ലഭിക്കും.