കല്‍പ്പറ്റ: കല്‍പ്പറ്റയില്‍ നിന്ന് നെടുമ്പാശേരിക്കുള്ള ലോഫ്‌ളോര്‍ എ.സി ബസുകള്‍ ട്രിപ്പുമുടക്കി യാത്രക്കാരെ ദുരിതത്തിലാക്കുന്നു.
ടയര്‍, സ്‌പെയര്‍പാട്‌സുകള്‍ തുടങ്ങി അറ്റകുറ്റപ്പണികളുടെ പേരിലാണ് പല സര്‍വിസുകളും പതിവായി മുടക്കുന്നത്. ലോഫ്‌ളോര്‍ എ.സി സര്‍വിസുകള്‍ നടത്തുന്നതിന് ആറ് ബസുകളാണ് കല്‍പ്പറ്റ ഡിപ്പോയിലുള്ളത്.
കഴിഞ്ഞ രണ്ട് വര്‍ഷമായി സര്‍വിസ് നടത്തികൊണ്ടിരുന്ന ഈ ബസുകള്‍ക്ക് 25000 മുതല്‍ 40000 രൂപവരെ പ്രതിദിന കളക്ഷന്‍ ലഭിച്ചിരുന്നു. വേനല്‍ കടുക്കുന്നതോടെ യാത്രക്കാര്‍ ഏറെ ആശ്രയിക്കുന്ന ബസാണ് ഇത്തരത്തില്‍ കട്ടപ്പുറത്തായിരിക്കുന്നത്.
മുന്‍കൂട്ടി ബുക്ക് ചെയ്യുന്നവരെ ഉള്‍പ്പടെ ഏറെ ദുരിതത്തിലാക്കിയിരിക്കുകയാണ്. കൂടാതെ ലോഫ്‌ളോര്‍ എ.സി ബസുകള്‍ സര്‍വിസ് മുടക്കം യാത്രക്കാരെ ദുരിതത്തിലാക്കുന്നതിനൊപ്പം കെ.എസ്.ആര്‍.ടി.സിക്ക് കനത്ത സാമ്പത്തിക നഷ്ടത്തിനും കാരണമാകുകയാണ്.