തിരുവനന്തപുരം: സംസ്ഥാനത്തെ ഹയര്‍സെക്കന്‍ഡറി സീറ്റുകളുടെ അസന്തുലിതാവസ്ഥ പഠിക്കാന്‍ സര്‍ക്കാര്‍ പുതിയ കമ്മിറ്റിയെ നിശ്ചയിച്ചു. കമ്മിറ്റിയുടെ അധ്യക്ഷന്‍ ഹയര്‍സെക്കന്‍ഡറി ഡയറക്ടര്‍ കെ.വി.മോഹന്‍കുമാറാണ്. മലബാറിലേതുള്‍പ്പെടെ ഒരു ലക്ഷത്തിലധികം പ്ലസ്‌വണ്‍ സീറ്റുകളുടെ കുറവുണ്ടെന്നു വാര്‍ത്തകള്‍ വന്നിരുന്നു. പ്ലസ്‌വണ്‍ സീറ്റുകളുടെ കാര്യത്തില്‍ സംസ്ഥാനത്ത് വലിയ അസന്തുലിതാവസ്ഥ ശ്രദ്ധയില്‍പ്പെട്ട സാഹചര്യത്തിലാണ് ഇക്കാര്യത്തില്‍ ശാസ്ത്രീയപഠനം നടത്തുന്നതിനായി സര്‍ക്കാര്‍ കമ്മിറ്റിയെ നിശ്ചയിച്ചത്. പ്ലസ്‌വണ്‍ സീറ്റുകളുടെ കുറവും ഹയര്‍ സെക്കന്‍ഡറി പഠനാവസരങ്ങളും കമ്മിറ്റി പരിശോധിക്കുമെന്നു കെ.വി.മോഹന്‍കുമാര്‍ അറിയിച്ചു.

ലക്ഷക്കണക്കിന് പ്ലസ്‌വണ്‍ സീറ്റുകളുടെ കുറവാണ് തൃശൂര്‍ മുതല്‍ കാസര്‍കോട് വരെയുള്ള ജില്ലകളിലുള്ളത്. അതേസമയം, പത്തനംതിട്ട, കോട്ടയം, ഇടുക്കി ജില്ലകളില്‍ സീറ്റുകള്‍ അധികമാണ്. ഹയര്‍സക്കന്‍ഡറി ഡയറക്ടര്‍ അധ്യക്ഷനായ കമ്മിറ്റിക്ക് കീഴില്‍ ഏഴ് മേഖലാ കമ്മിറ്റികളും ഉണ്ട്. ഓരോ കമ്മിറ്റിയും രണ്ട് ജില്ലകളിലെ ഹയര്‍സെക്കന്‍ഡറി ഉപരിപഠന സാധ്യത പരിശോധിക്കും. ഓരോ റവന്യൂജില്ലാ അടിസ്ഥാനത്തിലാണ് കമ്മിറ്റികള്‍ റിപ്പോര്‍ട്ട് തയാറാക്കുക. ഓരോ അഞ്ച് കിലോമീറ്റര്‍ പരിധിയിലും ഹയര്‍സെക്കന്‍ഡറി സ്‌കൂളുകള്‍ ഉണ്ടോ എന്ന കാര്യമാണ് കമ്മിറ്റി പ്രധാനമായും പരിശോധിക്കുക. ബാച്ചുകള്‍, സ്‌കൂളുകള്‍, അധിക സീറ്റുകള്‍ എന്നിങ്ങനെ കുറവുള്ള സ്ഥലങ്ങളില്‍ എന്താണ് ആവശ്യമെന്ന് കമ്മിറ്റി ശുപാര്‍ശ നല്‍കണം. ഇതിനുസരിച്ച് ഹയര്‍സെക്കന്‍ഡറി ഡയറക്ടര്‍ അധ്യക്ഷനായ കമ്മിറ്റി റിപ്പോര്‍ട്ട് തയാറാക്കും.