കൊച്ചി: വരാപ്പുഴ ശ്രീജിത്തിന്റെ കസ്റ്റഡി മരണത്തില്‍ പറവൂര്‍ സി.ഐ ക്രിസ്പിന്‍ അറസ്റ്റില്‍. സാമിനെ അഞ്ചാം പ്രതിയായി ചേര്‍ത്താണ് അറസ്റ്റ് ചെയ്തത്. അന്യായ തടങ്കല്‍, വ്യാജരേഖ ചമയ്ക്കല്‍ എന്നീ വകുപ്പുകള്‍ ചുമത്തിയാണ് കേസെടുത്തത്.

സി.ഐക്കെതിരെ നിലവില്‍ കൊലപാതക കുറ്റം ചുമത്തിയിട്ടില്ല. ആലുവ പൊലിസ് ക്ലബില്‍ നടത്തിയ ചോദ്യംചെയ്യലിനെത്തുടര്‍ന്നാണ് നടപടി.

നേരത്തെ കേസില്‍ വരാപ്പുഴ സ്റ്റേഷനിലെ എസ്.ഐ അടക്കം നാലുപേരെ അറസ്റ്റ് ചെയ്തിരുന്നു.

അതിനിടെ മരിച്ച വാസുദേവന്റെ മകന്‍ വിനീഷിന്റെ പേരില്‍ പൊലിസ് തന്നെ പ്രചരിപ്പിച്ച രണ്ടാമത്തെ മൊഴി വ്യാജമാണെന്ന് അന്വേഷണസംഘം സ്ഥിരീകരിച്ചു. ശ്രീജിത്തിനെ മര്‍ദിച്ചവര്‍ക്കെതിരെയെല്ലാം കൊലക്കുറ്റം ചുമത്താമെന്നായിരുന്നു നേരത്തേയുളള നിയമോപദേശം.