കക്കട്ടില്‍: അപകടം പതിവായ നാദാപുരം കുറ്റ്യാടി സംസ്ഥാന പാതയില്‍ സീബ്രാക്രോസിങ് ലൈനുകള്‍ മാഞ്ഞതോടെ കാല്‍ നടയാത്രക്കാര്‍ക്ക് അപകട ഭീഷണി ഉയരുന്നു. കഴിഞ്ഞ ദിവസങ്ങളില്‍ കക്കട്ടില്‍, നരിപ്പറ്റ റോഡ് എന്നിവിടങ്ങളില്‍ നടന്ന അപകടത്തില്‍ കാല്‍നട യാത്രക്കാരി വാഹനമിടിച്ച് മരിക്കുകയും, മറ്റൊരാള്‍ക്ക് ഗുരുതര പരുക്കേല്‍ക്കുകയും ചെയ്തിരുന്നു. നിരത്തുകളില്‍ സ്ഥാപിച്ച റിഫ്‌ലക്ടറുകളും അപ്രത്യക്ഷമായിരിക്കുകയാണ്. അമിത വേഗതയില്‍ വാഹനങ്ങള്‍ പോവുന്നതു കാല്‍ നടയാത്രക്കാരുടെ ജീവന് ഭീഷണിയായിട്ടും മാഞ്ഞു പോയ സീബ്ര ലൈനുകള്‍ മാറ്റി വരക്കണമെന്ന ആവശ്യം ശക്തമായിരിക്കുകയാണ്. കക്കട്ട് ടൗണ്‍, മൊകേരി, വട്ടോളി, അമ്പലകുളങ്ങര, നരിപ്പറ്റ റോഡ്, കുളങ്ങരത്ത്,ചേലക്കാട്, പയന്തോങ്ങ് ,കല്ലാച്ചി, നാദാപുരം ഉള്‍പ്പെടെയുള്ള തിരക്കേറിയ ഇടങ്ങളിലാണ് പൂര്‍ണ്ണമായോ ഭാഗികമായോ സിബ്രാലൈനുകള്‍ അപ്രത്യക്ഷമായിരിക്കുന്നത്. റോഡ് പണി പൂര്‍ത്തിയായ ഉടനെ വരച്ച സിബ്രാലൈനുകള്‍ മാറ്റി വരക്കാത്തതാണ് സുരക്ഷാ ഭീഷണിയായി മാറിയിരിക്കുന്നത്. രണ്ട് സ്‌കൂള്‍ വിദ്യാര്‍ത്ഥികളുടെ ജീവന്‍ അപഹരിച്ച വട്ടോളി ടൗണില്‍ ഫുട്പാത്ത് നിര്‍മിച്ചിട്ടുണ്ട്..
കഴിഞ്ഞ ദിവസം കക്കട്ട് ടൗണില്‍ വാാഹനങ്ങള്‍ കൂട്ടി ഇടിച്ചും അപകടമുണ്ടായിരുന്നു. യാത്ര സുരക്ഷിതമാക്കാനുള്ള നടപടികളുടെ ഭാഗമായി മാഞ്ഞു പോയ മുഴുവന്‍ സീബ്രാലൈനുകളും, റിഫ്‌ലക്ടറുകളും സ്ഥാപിക്കണമെന്നാണ് നാട്ടുകാരുടെ ആവശ്യം.