റിയാദ്: സഊദിയുടെ നേതൃത്തത്തിലുള്ള അറബ് സഖ്യസേന യമനില്‍ നിരോധിത ക്ലസ്റ്റര്‍ ബോംബുകള്‍ ഉപയോഗിച്ചതായി ആംനസ്റ്റി ഇന്റര്‍നാഷണല്‍ ആരോപിച്ചു. ഫെബ്രുവരി 15ന് ജനവാസ കേന്ദ്രത്തില്‍ സഖ്യസേന നടത്തിയ റെയ്ഡിനിടെ് ക്ലസ്റ്റര്‍ ബോംബ് വര്‍ഷം നടത്തിയതായാണ് കണ്ടെത്തിയത്. 

സആദാ പ്രവിശ്യയില്‍ റിബലുകളായ ഹൂതികള്‍ക്കെതിരെയാണ് റെയ്ഡ് നടത്തിയത്. ഇതിനിടയില്‍ നടത്തിയ വ്യോമാക്രമണത്തില്‍ പ്രവിശ്യയിലെ മൂന്നു ജനവാസ ജില്ലകളിലും കൃഷി ഭൂമികളിലും ബ്രസീല്‍ നിര്‍മ്മിത ക്ലസ്റ്റര്‍ ബോംബുകള്‍ ഉപയോഗിച്ച് ആക്രമണം നടത്തിയതായി കണ്ടെത്തിയെന്നും ആംനസ്റ്റി പ്രസ്താവനയില്‍ പറഞ്ഞു.
2015 ഒക്ടോബറിലും കഴിഞ്ഞ വര്‍ഷം മെയിലും സഖ്യസേന ക്ലസ്റ്റര്‍ ബോംബുകള്‍ ഉപയോഗിച്ചതായി ആരോപണമുയര്‍ന്നിരുന്നു. യുദ്ധത്തിനിടക്ക് ലംഘനം നടത്തരുതെന്ന അന്താരാഷ്ട്ര മര്യാദയാണ് സഊദിയുടെ നേതൃത്വത്തിലുള്ള സഖ്യസേന ലംഘിച്ചതെന്നും ഗുരുതരമായ പ്രത്യാഘാതങ്ങളാണ് ക്ലസ്റ്റര്‍ ബോംബ് വഴി ഉണ്ടാവുകയെന്നും ബൈറൂത് ആംനെസ്റ്റി റീജിയണല്‍ റിസര്‍ച്ച് ഡയറക്ടര്‍ ലൈന്‍ മാലൂഫ് പറഞ്ഞു. സഊദി സഖ്യസേനയോട് ഇതെ കുറിച്ച് വിവരങ്ങള്‍ കൈമാറാന്‍ ബോംബ് നിര്‍മ്മാതാക്കളായ ബ്രസീലിനോട് ആവശ്യപ്പെട്ടതായും ആംനെസ്റ്റി ഇന്റര്‍നാഷണല്‍ പറഞ്ഞു.
എന്നാല്‍, ആംനസ്റ്റി യുടെ ഗുരുതര ആരോപണത്തിനെതിരെ സഊദിയോ സഖ്യ സേനയോ ഇതുവരെ ഔദ്യോഗികമായി പ്രതികരിച്ചിട്ടില്ല. യമനില്‍ സഊദിയുടെ നേതൃത്വത്തിലുള്ള അറബ് സഖ്യസേനയുടെ നേതൃത്വത്തില്‍ യുദ്ധം ആരംഭിച്ച 2015 മാര്‍ച്ച് മുതല്‍ ഇതുവരെ പതിനായിരത്തോളം ആളുകള്‍ കൊല്ലപ്പെട്ടതായും 40, 000 ലധികം ആളുകള്‍ക്ക് പരിക്കേറ്റരുമായാണ് ഐക്യരാഷ്ട്ര സഭയുടെ കണക്കുകള്‍.