തളങ്കര: വീടിന്റെ പിറകുവശത്തെ ഗ്രില്‍സ് തകര്‍ത്ത് അകത്തുകടന്ന മോഷ്ടാവ് അലമാരയില്‍ സൂക്ഷിച്ചിരുന്ന പണവും രേഖകളുമടങ്ങിയ ബാഗുമായി കടന്നുകളഞ്ഞു. ഉറങ്ങിക്കിടക്കുകയായിരുന്ന കുട്ടികള്‍ ഉണര്‍ന്നതിനാല്‍ സ്വര്‍ണം നഷ്ടപ്പെട്ടില്ല. തെരുവത്ത് ഹൊന്നമൂലയിലെ അബ്ദുല്‍ ഖാദറിന്റെ വീട്ടിലാണ് ഇന്നലെ പുലര്‍ച്ചെ കവര്‍ച്ച നടന്നത്. വീടിന്റെ പിറകുവശത്തെ ഗ്രില്‍സ് തകര്‍ത്ത് അകത്തു കടന്ന മോഷ്ടാവ് അടുക്കളവാതില്‍ തകര്‍ത്ത് അകത്തു കടക്കുകയായിരുന്നു.
കുട്ടികള്‍ കിടക്കുന്ന മുറിയിലെത്തിയ മോഷ്ടാവ് അലമാരയില്‍ നിന്നു സ്വര്‍ണവും പണവും അപഹരിക്കുന്നതിനിടെ കുട്ടികള്‍ ഉണര്‍ന്നു. ഇതോടെ മോഷ്ടാവ് സ്വര്‍ണം ഉപേക്ഷിച്ച് പണവും പാസ്‌പോര്‍ട്ട് അടക്കമുള്ള വിലപിടിപ്പുള്ള രേഖകള്‍ സൂക്ഷിച്ചിരുന്ന പഴ്‌സുമായി കടന്നുകളയുകയായിരുന്നു. മോഷ്ടാവ് ഉപയോഗിച്ച കമ്പിപ്പാര സ്ഥലത്തുനിന്നു കണ്ടെത്തി.
പ്രദേശത്തെ മറ്റൊരു വീട്ടിലും കവര്‍ച്ചാ ശ്രമം നടന്നിട്ടുണ്ട്. പ്രസ്തുത വീടിന്റെ വാതില്‍ തുറക്കാന്‍ സാധിക്കാത്തതിനാല്‍ മോഷ്ടാവ് ശ്രമം ഉപേക്ഷിക്കുകയായിരുന്നു.വിവരമറിഞ്ഞ് പൊലിസ് സ്ഥലത്തെത്തി അന്വേഷണം തുടങ്ങി.