ന്യൂഡല്‍ഹി: സാമ്പത്തിക കുറ്റവാളികളായി വിദേശത്തേക്ക് രക്ഷപ്പെട്ടവരെ തിരിച്ചുകൊണ്ടുവരാന്‍ നടപടികള്‍ സ്വീകരിക്കുമെന്ന് കേന്ദ്രസര്‍ക്കാര്‍ അറിയിച്ചു. ഇതിനായി പരമാവധി രാജ്യങ്ങളുമായി സര്‍ക്കാര്‍ ഉടമ്പടി ഉണ്ടാക്കിവരികയാണെന്നും ഇനി ഇത്തരം കുറ്റവാളികള്‍ക്ക് മറ്റു രാജ്യങ്ങളില്‍ ഒളിച്ചുകഴിയാന്‍ സാധിക്കില്ലെന്നും ധനമന്ത്രി അരുണ്‍ ജയ്റ്റിലി ലോക്‌സഭയെ അറിയിച്ചു. അതുഉറപ്പുവരുത്താനുള്ള ശ്രമങ്ങളാണ് സര്‍ക്കാര്‍ നടത്തുന്നതെന്നും മന്ത്രി പറഞ്ഞു.
സാമ്പത്തിക തട്ടിപ്പ് നടത്തി രാജ്യത്ത് നിന്ന് ഒളിച്ചോടിയ ഐ.പി.എല്‍ മുന്‍ മേധാവി ലളിത് മോദിയെയും വ്യവസായി വിജയ്മല്യയെയും തിരിച്ചുകൊണ്ടുവരാന്‍ കേന്ദ്രസര്‍ക്കാര്‍ എന്തു നടപടിയെടുത്തെന്ന തൃണമൂലിലെ സുഗത റോയിയുടെ ചോദ്യത്തിന് മറുപടിയായാണ് ജയ്റ്റിലി ഇക്കാര്യം വ്യക്തമാക്കിയത്. ലളിത് മോദിയുടെയും മല്യയുടെയും പേരുകള്‍ പരാമര്‍ശിക്കാതെയായിരുന്നു സുഗതാ റോയിയുടെ ചോദ്യം. സഭയില്‍ ആരുടെയും പേര് പറഞ്ഞ് ആരോപണം ഉന്നയിക്കരുതെന്ന സ്പീക്കറുടെ നിര്‍ദ്ദേശത്തെ തുടര്‍ന്ന് ഇരുവരുടെയും പേരുകള്‍ പറയാതെ ഐ.പി.എല്‍ മാന്‍ കിങ്ഫിഷര്‍ മാന്‍ എന്നിങ്ങനെയാണ് സുഗതാ റോയ് വിശേഷിപ്പിച്ചത്.