ന്യൂഡല്‍ഹി: പശ്ചിമബംഗാളില്‍ കോണ്‍ഗ്രസുമായി സഖ്യമുണ്ടാക്കി തെരഞ്ഞെടുപ്പില്‍ മത്സരിച്ചതിനെച്ചൊല്ലി സി.പി.എമ്മില്‍ പൊട്ടിത്തെറി. സഖ്യം പാര്‍ട്ടി നയരേഖക്ക് വിരുദ്ധമാണെന്ന് രേഖപ്പെടുത്താത്തില്‍ പ്രതിഷേധിച്ച് കേന്ദ്ര കമ്മിറ്റിയംഗം ജഗ്മതി സംഗ്‌വാന്‍ രാജിവച്ചു.

ന്യൂഡല്‍ഹിയില്‍ നടക്കുന്ന കേന്ദ്ര കമ്മിറ്റി യോഗത്തിനിടെയാണ് ജഗ്മതി സംഗ്‌വാന്‍ രാജിവച്ച് പുറത്തുപോയത്. ഭൂരിഭാഗം അംഗങ്ങളും സഖ്യം പാര്‍ട്ടിനയ വിരുദ്ധമാണെന്ന അഭിപ്രായം ഉന്നയിച്ചെങ്കിലും അംഗീകരിക്കാന്‍ പി.ബി തയ്യാറാവുന്നില്ലെന്ന് ജഗ്മതി സംഗ്‌വാന്‍ പ്രതികരിച്ചു. ഹരിയാനയില്‍ നിന്നുള്ള മുതിര്‍ന്ന സി.പി.എം നേതാവാണ് ജഗ്മതി സംഗ്‌വാന്‍.

പാര്‍ട്ടിയുടെ പ്രാഥമിക അംഗത്വത്തില്‍ നിന്നു പുറത്താക്കി

ബംഗാള്‍ കോണ്‍ഗ്രസ് സഖ്യത്തില്‍ അമര്‍ഷം രേഖപ്പെടുത്തി രാജിവച്ച് പുറത്തുപോയ ജഗ്മതി സംഗ്‌വാനെ കേന്ദ്ര കമ്മിറ്റിയില്‍ നിന്നും പാര്‍ട്ടിയുടെ പ്രാഥമിക അംഗത്വത്തില്‍ നിന്നും പുറത്താക്കി. രാജിവച്ച് കേന്ദ്ര കമ്മിറ്റിയില്‍ നിന്ന് ഇറങ്ങിവന്ന് ജഗ്മതി സംഗ്‌വാന്‍ മാധ്യമങ്ങളെ കണ്ട് ഒരു മണിക്കൂറിനു ശേഷമാണ് കേന്ദ്ര കമ്മിറ്റി പത്രക്കുറിപ്പ് ഇറക്കിയത്. ഗുരുതരമായ അച്ചടക്ക ലംഘനം നടത്തിയതായും പുറത്താക്കുന്നതായും പത്രക്കുറിപ്പില്‍ പറയുന്നു.