കാക്കനാട്: ജില്ലയിലെ കാര്‍ഷികോല്‍പാദനപുനരുദ്ധാരണ മേഖലകള്‍ക്കും, വിദ്യാഭ്യാസ,പട്ടികജാതി-പട്ടികവര്‍ഗ്ഗ മേഖലയിലെ സമഗ്രവികസനങ്ങള്‍ക്കും പ്രഥമ പരിഗണന നല്‍കി ജില്ലാ പഞ്ചായത്ത് ബജറ്റ്. 2019 -20 സാമ്പത്തിക വര്‍ഷത്തിലേക്കുള്ള ബജറ്റ് ജില്ലാ പഞ്ചായത്ത് പ്രസിഡന്റ് ആശാ സനില്‍ അധ്യക്ഷതയില്‍ വൈസ് പ്രസിഡന്റ് അഡ്വ.ബി.എ അബ്ദുല്‍ മുത്തലിബ് അവതരിപ്പിച്ചു.
വികസന മേഖല 17.29കോടി, പൊതുമരാമത്ത് മേഖല 60.50 കോടി,സാമൂഹ്യ നീതി 19. 62 കോടി, വിദ്യാഭ്യാസം 12.51 കോടി, ആരോഗ്യം 16.10 കോടി, വനിതാ വികസനം 6.26 കോടി, പട്ടിക ജാതി പട്ടികവര്‍ഗ്ഗ മേഖല 18.16കോടി രൂപ വകയിരുത്തി കൊണ്ട് 170.72 കോടിരൂപ ചെലവാക്കുക വഴി 86.35 ലക്ഷം രൂപ മിച്ചമാണ് ബജറ്റില്‍ പ്രതീക്ഷിക്കുന്നത്.ക്ഷീരമേഖലക്കു പുറമെ, തെങ്ങ്, നെല്ല്, മത്സ്യം തുടങ്ങി കാര്‍ഷിക മേഖലയിലും, വിത്ത് ഉല്‍പാദന കേന്ദ്രങ്ങളുടെ സമഗ്ര പ്രവര്‍ത്തനങ്ങള്‍ക്കും ബജറ്റില്‍ പ്രത്യേകം ഊന്നല്‍ നല്‍കുന്നു.
കൃഷിത്തോട്ട വികസനങ്ങള്‍ക്കും കൂടുതല്‍ തുക വകയിരുത്തിയിട്ടുണ്ട്. ജില്ലാ പഞ്ചായത്തിനു മുമ്പില്‍ ഗാന്ധി പ്രതിമ സ്ഥാപിക്കുന്നതിനായി 10 ലക്ഷം രൂപയും, ക്ലോക്ക് ടവറിന്റെ നിര്‍മാണത്തിന് 10 ലക്ഷവും വകയിരുത്തിയിട്ടുണ്ട്. പ്രളയത്തില്‍ തകര്‍ന്ന കൈത്തറി മേഖലയുടെ പുനരുദ്ധാരണ പ്രവര്‍ത്തനങ്ങള്‍ക്കായി 30 ലക്ഷം രൂപയും മാറ്റിവച്ചിട്ടുണ്ട്.