ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ ടോട്ടനം ഹോട്‌സ്പറിന് തകര്‍പ്പന്‍ ജയം. മറുപടിയില്ലാത്ത രണ്ട് ഗോളുകള്‍ക്ക് ടോട്ടനം വാട്‌ഫോര്‍ഡിനെ തകര്‍ത്തു. ഇരു പകുതികളിലായി ഡലെ അല്ലി, ഹാരി കെയ്ന്‍ എന്നിവരുടെ ഗോളുകളാണ് ടോട്ടനത്തിന് സ്വന്തം തട്ടകത്തില്‍ വിജയമൊരുക്കിയത്. 16ാം മിനുട്ടില്‍ ഡാലെ അലിയാണ് ടോട്ടനത്തിന് ലീഡൊരുക്കിയത്. പിന്നീട് 48ാം മിനുട്ടിലാണ് പരുക്ക് മാറി ടീമില്‍ തിരികെയെത്തിയ ഹാരി കെയ്ന്‍ തിരിച്ചുവരവ് ഗോള്‍ നേട്ടത്തോടെ ആഘോഷിച്ചത്.
ജയത്തോടെ ടോട്ടനം നാലാം സ്ഥാനത്ത് തുടരുന്നു. അതേസമയം മൂന്നാമതുള്ള ലിവര്‍പൂളുമായുള്ള പോയിന്റ് വ്യത്യാസം ഒന്നാക്കി കുറയ്ക്കാനും ടോട്ടനത്തിന് സാധിച്ചു.
ലിവര്‍പൂളിനേക്കാള്‍ ഒരു മത്സരം കുറച്ച് കളിച്ചതിനാല്‍ അവര്‍ക്ക് അടുത്ത മത്സരം വിജയിച്ച് ലിവര്‍പൂളിനെ പിന്തള്ളി മൂന്നാം സ്ഥാനത്തെത്താനുള്ള അവസരവുമുണ്ട്. അതുവഴി അടുത്ത സീസണിലെ ചാംപ്യന്‍സ് ലീഗിലേക്ക് നേരിട്ട് യോഗ്യത ഉറപ്പിക്കുകയാണ് ടോട്ടനത്തിന് മുന്‍പിലുള്ള ലക്ഷ്യം.