കുരിശുമല: ആഗോള കത്തോലിക്കാസഭ യുവജന വര്‍ഷമായി ആചരിക്കുന്ന പശ്ചാത്തലത്തില്‍ തെക്കന്‍ കുരിശുമല തീര്‍ഥാടന കേന്ദ്രത്തില്‍ യുവജന വര്‍ഷ കര്‍മപദ്ധതികള്‍ക്കു തുടക്കമായി.
സംഗമവേദിയില്‍ നിന്ന് നെറുകയിലേയ്ക്കു നടത്തിയ വിശ്വാസ തീര്‍ഥാടനത്തിലും വിശുദ്ധകുരിശിന്റെ സന്നിധിയിലര്‍പ്പിച്ച ആഘോഷമായ ദിവ്യബിലയിലും നൂറുകണക്കിന് യുവജനങ്ങള്‍ പങ്കെടുത്തു. ഒരു വര്‍ഷം നീണ്ടുനില്‍ക്കുന്ന കര്‍മപദ്ധതികളും പ്രകാശനം ചെയ്തു.
ഞായറാഴ്ച പുലര്‍ച്ചെ മുതല്‍ നെയ്യാറ്റിന്‍കര രൂപതയിലെ വിവിധ ഇടവകകളില്‍ നിന്ന് നിവധി യുവജനങ്ങള്‍ മലകയറി പ്രാര്‍ഥിച്ചു. വൈകുന്നേരം 3.00 ന് നടന്ന ആഘോഷമായ ദിവ്യബലിയില്‍ റവ.ഫാ. പ്രദീപ് ആന്റോ മുഖ്യകാര്‍മികനായി ഫാ.ജോഷി രഞ്ജന്‍,
ഫാ.രതീഷ് മാര്‍ക്കോസ് എന്നിവര്‍ സഹകാര്‍മികരായി. തുടര്‍ന്ന് യുവജനങ്ങള്‍ ഒന്നുചേര്‍ന്ന് വിശ്വാസ പ്രഖ്യാപനവും നടത്തി.
വൈകുന്നേരം 4.00 നു നടന്ന പൊതുസമ്മേളനത്തില്‍ കേരളത്തില്‍ നിന്നും തമിഴ്‌നാട്ടില്‍ നിന്നുമായി നിരവധി പ്രതിനിധികള്‍ പങ്കെടുത്തു.
ഇന്ത്യയുടെ വിവിധ ഭാഗങ്ങളില്‍ ന്യൂനപക്ഷങ്ങള്‍ക്ക് നേരിടേണ്ടിവരുന്ന അതിക്രമങ്ങളെ യോഗം അപലപിച്ചു.
രാജ്യം നേരിടുന്ന അസഹിഷ്ണുതയും മതമൗലികവാദവും മതതീവ്രവാദവും സാമൂഹിക രാഷ്ട്രീയ അരാജകത്വവും മാനവികതയുടെ ധ്രുവീകരണത്തെയാണ് സൂചിപ്പിക്കുന്നതെന്ന് യോഗം വിലയിരുത്തി.
രാഷ്ട്രീയ മത സാമൂദായിക പരഗണനകള്‍ക്കതീതമായി മനുഷ്യനന്മയെ ലക്ഷ്യം വച്ചുള്ള പ്രവര്‍ത്തനങ്ങളും കര്‍മപദ്ധതികളുമാണ് യുവജനവര്‍ഷം ലക്ഷ്യം വയ്ക്കുന്നതെന്ന് കുരിശുമല ഡയറക്ടര്‍ മോണ്‍സിഞ്ഞോര്‍ ഡോ. വിന്‍സെന്റ് കെ.പീറ്റര്‍ പറഞ്ഞു.