ജിദ്ദ: സഊദിയില്‍ കിഴക്കന്‍ പ്രവിശ്യയിലെ ഖത്തീഫില്‍ സുരക്ഷാ സേനയുമായുണ്ടായ ഏറ്റുമുട്ടലില്‍ ഭീകരന്‍ കൊല്ലപ്പെട്ടു. നിരവധി ഭീകരാക്രമണങ്ങള്‍ നടത്തിയ മുസ്തഫ അലി അബ്ദുല്ല അല്‍മുദാദ് ആണ് കൊല്ലപ്പെട്ടത്.

കഴിഞ്ഞ ദിവസം ഖത്തീഫില്‍ ഭീകരന്‍ കാറില്‍ സഞ്ചരിക്കുന്നത് സുരക്ഷാ സൈനികരുടെ ശ്രദ്ധയില്‍ പെടുകയായിരുന്നു. വാഹനം നിര്‍ത്തി കീഴടങ്ങാന്‍ ആവശ്യപ്പെട്ടെങ്കിലും ഇത് അവഗണിച്ച് ഭീകരന്‍ സുരക്ഷാ ഭടന്മാര്‍ക്കു നേരെ നിറയൊഴിക്കാന്‍ തുടങ്ങി.

കീഴടങ്ങുന്നതിന് സുരക്ഷാ സൈനികര്‍ ആവശ്യപ്പെട്ടെങ്കിലും ഇയാള്‍ ചെവിക്കൊണ്ടില്ല. തുടര്‍ന്ന് നടത്തിയ പ്രത്യാക്രമണത്തിലാണ് ഭീകരന്‍ കൊല്ലപ്പെട്ടത്. ഏറ്റുമുട്ടലിനിടെ സുരക്ഷാ ഭടന്മാരില്‍ ഒരാള്‍ക്ക് നിസ്സാര പരിക്കേറ്റു. ഇദ്ദേഹത്തെ ആശുപത്രിയില്‍ പ്രവേശിപ്പിച്ചതായി ആഭ്യന്തര സുരക്ഷാ വിഭാഗം അറിയിച്ചു.

ആഭ്യന്തര മന്ത്രാലയം ഭീകര പട്ടികയില്‍ പെടുത്തിയവരും ഇവരുമായി ബന്ധമുള്ളവരും അടക്കം ഭീകരാക്രമണങ്ങളില്‍ പങ്കുള്ള മറ്റു പ്രതികള്‍ക്കു വേണ്ടി സുരക്ഷാ വിഭാഗം അന്വേഷണം തുടരുകയാണ്.