പാനൂര്‍: സി.പി.എം ഏരിയാ കമ്മിറ്റി സെക്രട്ടറിയുടെ വാഹനത്തിന്റെ ഡ്രൈവര്‍ക്കു നേരെ അക്രമം. ഏഴ് പേര്‍ക്കെതിരെ പാനൂര്‍ പൊലിസ് കേസെടുത്തു. സി.പി.എം പ്രവര്‍ത്തകനായ അരയാക്കൂല്‍ ജന്മീന്റവിട വിഗേഷ് (32) നാണ് മര്‍ദനമേറ്റത്.
 ബിജു, പ്രിയേഷ്, സഹ്യന്‍, ബിജോയ് തുടങ്ങിയ ഏഴുപേര്‍ മാരകായുധങ്ങളുമായെത്തി അക്രമിച്ചുവെന്നാണ് പരാതി.
ഒന്നരമാസം മുന്‍പ് അരയാക്കൂലിനടുത്ത് വച്ച് പണം വച്ച് ചീട്ടുകളിക്കുകയായിരുന്ന സംഘത്തെ പൊലിസ് പിടികൂടി 48000 രൂപ പിടിച്ചെടുത്തിരുന്നു.
ഈ വിവരം നല്‍കിയത് വിഗേഷാണെന്നാരോപിച്ചാണ് അക്രമം. അക്രമം തടയാനെത്തിയ ബിഗേഷിന്റെ മാതാപിതാക്കള്‍ക്കും അയല്‍വാസിയായ ഷാജിക്കും പരുക്കേറ്റു.
അക്രമികള്‍ക്കെതിരെ കര്‍ശന നടപടിസ്വീകരിക്കണമെന്നു സി.പി.എം ചമ്പാട് ലോക്കല്‍ കമ്മിറ്റി ആവശ്യപ്പെട്ടു.