തിരുവനന്തപുരം: പ്രസവാവധിക്ക് ശേഷം നഴ്‌സിങ്‌ജോലി നിഷേധിച്ച സംഭവത്തില്‍ വനിതാകമ്മിഷന്‍ ഇടപെടലിനെ തുടര്‍ന്ന് യുവതിക്ക് ജോലിയില്‍ തിരികെ പ്രവേശനം ലഭിച്ചു. പ്രസവാവധി കാലത്തെ ശമ്പളവും നല്‍കാന്‍ തീരുമാനമായി. വനിതാ കമ്മിഷന്‍ അംഗം ഇ.എം.രാധയുടെ നിര്‍ദ്ദേശത്തെ തുടര്‍ന്നാണ് യുവതിക്ക് അനുകൂലമായ തീരുമാനമുണ്ടായത്. 2018 മാര്‍ച്ച് ഒന്നാം തീയതി യുവതി ജോലിയില്‍ പുനപ്രവേശിക്കുകയും ചെയ്തു.
തിരുവനന്തപുരം കാരോട് പഞ്ചായത്തിന് കീഴിലുളള പ്രാഥമിക ആരോഗ്യ കേന്ദ്രത്തില്‍ പാലിയേറ്റീവ് കെയര്‍ നഴ്‌സായി ജോലി ചെയ്യുന്ന കാരോട് കോണത്തുവിള വീട്ടില്‍ ആര്‍. ജോളിയാണ് പരാതിക്കാരി. നിയമാനുസൃതം അനുവദിച്ച പ്രസവാവധി കഴിഞ്ഞ് ജോലിയില്‍ തിരികെ പ്രവേശിക്കാന്‍ അപേക്ഷ നല്‍കിയിട്ടും പഞ്ചായത്ത് സെക്രട്ടറിയും മെഡിക്കല്‍ ഓഫിസറും ജോലിയില്‍ പ്രവേശിക്കുന്നത് നിഷേധിക്കുകയായിരുന്നുവെന്നാണ് പരാതി.
പാലിയേറ്റീവ് നഴ്‌സുമാര്‍ക്ക് പ്രസവാവധികാലത്ത് നിയമാനുസൃതമുളള ശമ്പളവും തുടര്‍ന്ന് ജോലിയില്‍ പുനപ്രവേശിക്കുന്നതിനുളള അവകാശവും സര്‍ക്കാര്‍ ഉത്തരവ് പ്രകാരം നിലവിലുണ്ട്. ഈ ഉത്തരവ് നിലവിലിരിക്കെ അനാവശ്യവാദങ്ങള്‍ ഉന്നയിച്ച് ജോലിയില്‍ പ്രവേശിപ്പിക്കുന്നത് തടയുകയായിരുന്നു. സ്ത്രീ എന്ന നിലയിലുളള തന്റെ അവകാശം നിഷേധിക്കുകയും പ്രസവിക്കുന്നത് തെറ്റായി പോയി എന്ന രീതിയില്‍ തന്റെ സ്ത്രീത്വത്തെ അപമാനിക്കുകയും ചെയ്തതായി പരാതിയില്‍ പറയുന്നു.
വികലാംഗനായ ഭര്‍ത്താവും വൃദ്ധരായ മാതാപിതാക്കളും അടങ്ങുന്ന തന്റെ കുടുംബത്തിന് ഇക്കാരണത്താല്‍ ഏറെ ദുരിതങ്ങള്‍ അനുഭവിക്കേണ്ടി വന്നുവെന്നും പരാതിയിലുണ്ട്.
പരാതിക്കാരിയെയും എതിര്‍കക്ഷികളെയും കമ്മിഷന്‍ ആസ്ഥാനത്ത് വിളിപ്പിച്ചിരുന്നു. തുടര്‍ന്നാണ് യുവതിക്ക് അനുകൂലമായ തീരുമാനമുണ്ടായത്.