മലപ്പുറം: ബി.ജെ.പിയുമായി യഥാര്‍ഥത്തില്‍ സഖ്യമുണ്ടാക്കുന്നത് കേരളത്തിലെ സി.പി.എമ്മാണെന്ന് മുസ്്‌ലിം ലീഗ് ദേശീയ ജനറല്‍ സെക്രട്ടറി പി.കെ.കുഞ്ഞാലിക്കുട്ടി എം.പി. പശ്ചിമബംഗാളിലെ സി.പി.എമ്മുകാര്‍ യാഥാര്‍ഥ്യം അറിഞ്ഞതിനാലാണ് കോണ്‍ഗ്രസിനു പിന്തുണ നല്‍കിയത്. കോണ്‍ഗ്രസ് പിന്തുണ ഇല്ലെങ്കില്‍ പാര്‍ലമെന്റില്‍ എത്തില്ലെന്ന് അവര്‍ മനസിലാക്കി. കേരളത്തിലെ സി.പി.എമ്മാണ് ഇതിനു പാരവയ്ക്കുന്നത്.

ദേശീയ തലത്തില്‍ കൂടെനില്‍ക്കുകയും കേരളത്തില്‍ അവര്‍ കോണ്‍ഗ്രസിനെ എതിര്‍ക്കുകയും ചെയ്യുന്നു. സംസ്ഥാനത്ത് ബി.ജെ.പി.യെ എതിര്‍ക്കുന്ന സി.പി.എം. ദേശീയതലത്തില്‍ നീക്കുപോക്കാണ് നടത്തുന്നത്. ദേശീയതലത്തില്‍ കോണ്‍ഗ്രസ് സഖ്യത്തിനു കീഴിലുണ്ടോ എന്നു സി.പി.എം. വ്യക്തമാക്കണം. മുസ്‌ലിം ലീഗിന്റെ മൂന്നാംസീറ്റ് അതിന്റേതായ സമയത്തു ചര്‍ച്ച ചെയ്യും. ബംഗാളില്‍ ലീഗ് മത്സരിക്കാന്‍ സാധ്യതയുണ്ട്. തമിഴ്‌നാട്ടില്‍ വീണ്ടും എം.പി. സ്ഥാനമുണ്ടാകും. ചിലപ്പോള്‍ ദേശീയതലത്തില്‍ സി.പി.എമ്മിനേക്കാള്‍ സീറ്റ് നേടുമെന്നും കുഞ്ഞാലിക്കുട്ടി പറഞ്ഞു.