ജിദ്ദ: യമനില്‍ സൈന്യത്തെ പിന്‍വലിക്കാന്‍ വിമതരും സൈനികരും തമ്മില്‍ ധാരണയിലെത്തിയതായി ഐക്യരാഷ്ട്രസഭ അറിയിച്ചു. മൂന്നു ദിവസമായി നടന്നുവന്ന യോഗത്തിലാണ് തീരുമാനം.
ഈ മാസം മൂന്നുമുതല്‍ ആറുവരെ ഹുദൈദയിലെ തീരത്ത് കപ്പലിലായിരുന്നു ചര്‍ച്ച. സൈന്യം പിടികൂടുമോ എന്ന ശിഈ വിമതരായ ഹൂത്തികളുടെ ഭയത്തെ തുടര്‍ന്നായിരുന്നു ചര്‍ച്ച കപ്പലിലാക്കിയത്. ഐക്യരാഷ്ട്രസഭാ പ്രതിനിധി പാട്രിക് കാമത് ആയിരുന്നു മധ്യസ്ഥന്‍.
മൂന്നു ദിവസത്തെ ചര്‍ച്ചയുടെ റിപ്പോര്‍ട്ട് ഐക്യരാഷ്ട്രസഭക്ക് സമര്‍പ്പിച്ചാണ് വിജയം പ്രഖ്യാപിച്ചത്. ഹൂത്തികളും യമന്‍ സൈന്യവും ചര്‍ച്ചയില്‍ പങ്കെടുത്തു.
യമന്‍ യുദ്ധം അവസാനിപ്പിക്കാനുള്ള നടപടിയുടെ ഭാഗമായി ആദ്യം തടവുകാരെ കൈമാറും. സൈനിക പിന്‍മാറ്റമാണ് ചര്‍ച്ചയിലുണ്ടായ മറ്റൊരു പ്രധാന തീരുമാനം. എല്ലാ വിഭാഗത്തില്‍ നിന്നുള്ളവരും ഹുദൈദയില്‍ നിന്നുള്ള സൈനിക പിന്മാറ്റത്തിന് സന്നദ്ധമാണ്. സഊദി സഖ്യസേനയും ചര്‍ച്ചക്ക് പിന്തുണ പ്രഖ്യാപിച്ചതാണ് ഫലം അനുകൂലമാവുന്നതിലെത്തിയത്. ഹുദൈദയില്‍ നിന്നുള്ള ആദ്യഘട്ട പിന്മാറ്റം ഉടന്‍ പ്രഖ്യാപിക്കുമെന്ന് സൈനിക വിഭാഗങ്ങള്‍ അറിയിച്ചു.
ഹൂത്തികളെ തുരത്താനായി 2015ലാണ് സഊദിയുടെ നേതൃത്വത്തിലുള്ള സഖ്യം യമനില്‍ ആക്രമണം തുടങ്ങിയത്.
മുന്‍ ഏകാധിപതി അലി അബ്ദുല്ല സ്വാലിഹിനെ ജനകീയ പ്രക്ഷോഭത്തിലൂടെ പുറത്താക്കിയതിനെ തുടര്‍ന്ന് രൂപപ്പെട്ട രാഷ്ട്രീയ അസ്ഥിരതയ്ക്കു പിന്നാലെയാണ് യമനില്‍ ഹൂത്തികള്‍ മൂന്നേറിയത്.
അമേരിക്കയുടെ പിന്തുണയോടെ സഖ്യം ഇതിനകം 18,000 ആക്രമണങ്ങളാണ് യമനില്‍ നടത്തിയത്. വ്യോമാക്രമണങ്ങളില്‍നിന്ന് വിട്ടുനില്‍ക്കുകയാണെന്ന് കഴിഞ്ഞദിവസം മൊറോക്കോ അറിയിച്ചിരുന്നു.