വളാഞ്ചേരി: സമന്വയ വിദ്യാഭ്യാസ രംഗത്ത് ശ്രദ്ധേയമായ കോ ഓഡിനേഷന്‍ ഓഫ് ഇസ്‌ലാമിക് കോളജസിന്റെ കീഴില്‍ വാഫി സ്‌നേഹബന്ധുക്കള്‍ ഒരുമിച്ച അര്‍ഹാം അസംബ്ലി ശ്രദ്ധേയമായി. വളാഞ്ചേരി മര്‍കസില്‍ ഇന്നലെ നടന്ന അസംബ്ലിയില്‍ പതിനായിരത്തോളം പേരാണു പങ്കെടുത്തത്.
കാസര്‍കോട്, കണ്ണൂര്‍, വയനാട്, കോഴിക്കോട് ജില്ലകളിലെ അര്‍ഹാം അംഗങ്ങള്‍ നേരത്തെ കണ്ണൂരില്‍ നടന്ന വാഫി കലോത്സവത്തോടനുബന്ധിച്ചു സംഗമിച്ചിരുന്നു. മറ്റുജില്ലയില്‍ നിന്നുള്ളവരാണ് വളാഞ്ചേരിയില്‍ രണ്ടാംഘട്ട അസംബ്ലിക്കെത്തിയത്.

സമസ്ത ഉപാധ്യക്ഷന്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ അര്‍ഹാം അസംബ്ലി ഉദ്ഘാടനം ചെയ്തു. കാലിക വിഷയങ്ങളില്‍ ഇടപെടുന്ന പണ്ഡിത സമൂഹം അനിവാര്യമാണെന്നും അതിനുതകുന്നതാണ് വാഫി സംവിധാനമെന്നും തങ്ങള്‍ പറഞ്ഞു.

ചെറുവാളൂര്‍ ഹൈദ്രൂസ് മുസ്‌ലിയാര്‍ പ്രാര്‍ഥന നടത്തി. സി.ഐ.സി കോ ഓഡിനേറ്റര്‍ അബ്ദുല്‍ ഹക്കീം ഫൈസി ആദൃശേരി സന്ദേശ ഭാഷണം നടത്തി. ഡോ. സാലിം ഫൈസി കൊളത്തൂര്‍, അഹ്മദ് വാഫി കക്കാട്, ഇഖ്ബാല്‍ വാഫി വേങ്ങര വിവിധ വിഷയങ്ങളില്‍ സംസാരിച്ചു. കോഴിക്കോട് വലിയ ഖാസി സയ്യിദ് നാസര്‍ അബ്ദുല്‍ഹയ്യ് ശിഹാബ് തങ്ങള്‍, പി.എസ്.എച് തങ്ങള്‍, കെ.കെ.എസ് തങ്ങള്‍ വെട്ടിച്ചിറ, കാടാമ്പുഴ മൂസ ഹാജി, ഹംസ മുസ്‌ലിയാര്‍, അസീസ് ഹാജി പുത്തന്‍ചിറ, പൂക്കോയ തങ്ങള്‍, ഇബ്രാഹിം ഫൈസി റിപ്പണ്‍, ഹംസ ഹൈതമി സംബന്ധിച്ചു. കുഞ്ഞാമു ഫൈസി താനൂര്‍ ആമുഖ ഭാഷണവും ഡോ. ജലീല്‍ വാഫി നന്ദിയും പറഞ്ഞു. റഷീദിയ്യ വാഫി കോളജ് പുറത്തിറക്കിയ സൈദ് മുഹമ്മദ് നിസാമി സ്മരണിക, വിവിധ വഫിയ്യ കാംപസുകളിലെ പതിമൂന്ന് മാഗസിനുകള്‍ എന്നിവ അസംബ്ലിയില്‍ പ്രകാശനം ചെയ്തു.