കൊല്ലം: പാരിപ്പള്ളിയില്‍ പൊലീസ് ഡ്രൈവര്‍ മണിയന്‍പിള്ളയെ കുത്തിക്കൊലപ്പെടുത്തുമ്പോള്‍ ആട് ആന്റണി സഞ്ചരിച്ചിരുന്ന വെള്ള മാരുതി ഒമ്‌നി വാന്‍ അതിന്റെ മുന്‍ ഉടമകള്‍ തിരിച്ചറിഞ്ഞു.
രജിസ്‌ട്രേഡ് ഉടമ ഉള്‍പ്പെടെ അഞ്ചുപേരിലൂടെ കൈമറിഞ്ഞാണ് വാന്‍ ആട് ആന്റണിയുടെ കൈവശമെത്തിയത്. ഏറ്റവും ഒടുവില്‍ തമിഴ്‌നാട് സ്വദേശിനിയായ സ്ത്രീയില്‍ നിന്നാണ് ആന്റണി വാന്‍ വാങ്ങിയത്. തമിഴ്‌നാട്ടുകാരാണ് വാനിന്റെ മുന്‍ ഉടമകളെല്ലാം.ഭരണീന്ദ്രന്‍ എന്നയാളാണ് വാനിന്റെ രജിസ്‌ട്രേഡ് ഉടമ. 2009ലാണ് വാന്‍ വാങ്ങിയത്. അന്ന് വാനിന് ചുവപ്പ് നിറമായിരുന്നു. 2011ല്‍ മണികണ്ഠന്‍ എന്നയാള്‍ വാന്‍ വാങ്ങിയശേഷം അത് വെള്ള നിറമാക്കി. പിന്നീട് ജീവ, സത്യപ്രകാശം എന്നിവര്‍ വാന്‍ സ്വന്തമാക്കി. സത്യപ്രകാശം വാനിന്റെ സ്റ്റിയറിംഗ് വീലില്‍ കറുപ്പും വെളുപ്പും നിറത്തിലുള്ള കവര്‍ ഇട്ടു. ആട് ആന്റണി കൊലപാതകം നടത്തുമ്പോഴും വാനിന്റെ സ്റ്റിയറിംഗില്‍ കിടന്നിരുന്നത് ഈ കവര്‍ തന്നെയായിരുന്നു.
സത്യപ്രകാശത്തില്‍ നിന്ന് രാജശ്രീ എന്ന സ്ത്രീ വാന്‍ വാങ്ങി. ഇവരില്‍ നിന്ന് 2011 നവംബര്‍ 17നാണ് ആട് ആന്റണി വാന്‍ സ്വന്തമാക്കിയത്. ആട് ആന്റണി സ്വന്തം പേരിലുള്ള ഡ്രൈവിംഗ് ലൈസന്‍സ് ഹാജരാക്കിയാണ് രേഖകളില്‍ ഒപ്പിട്ടതെന്ന് രാജശ്രീ ജില്ലാ പ്രിന്‍സിപ്പല്‍ സെഷന്‍സ് കോടതിയില്‍ മൊഴി നല്‍കി. പ്രതിക്കൂട്ടിലുണ്ടായിരുന്ന ആട് ആന്റണിയേയും കോടതി വളപ്പിലിട്ടിരുന്ന വെള്ള മാരുതി ഒമ്‌നിവാനും സാക്ഷി തിരിച്ചറിഞ്ഞു. പ്രോസിക്യൂഷനുവേണ്ടി സ്‌പെഷ്യല്‍ പ്രോസിക്യൂട്ടര്‍ ജി മോഹന്‍രാജ് ഹാജരായി.