ഹരിപ്പാട്: മാരകായുധങ്ങളുമായി നാരകത്തറ അനന്തപുരം ജങ്ക്ഷനില്‍ വഴിയാത്രികരെയും നാട്ടുകാരെയും ഭീഷണിപ്പെടുത്തിയ ക്വൊട്ടേഷന്‍ സംഘത്തെ സാഹസികമായി പോലീസ് പിടികൂടി. വധശ്രമമടക്കം നിരവധി അക്രമങ്ങളില്‍ പ്രതികളായ മൂന്നു പേരെയും ഇവരില്‍നിന്ന് ലഭിച്ച വിവരത്തിന്റെ അടിസ്ഥാനത്തില്‍ കൂട്ടാളിയായ മറ്റൊരാളേയും ഹരിപ്പാട് പോലിസ് അറസ്റ്റ് ചെയ്തു.
താമല്ലാക്കല്‍ തെക്ക് നെടുമ്പോച്ചയില്‍ ആദിത്യന്‍ (23), എരിക്കാവ് വിളയില്‍ പടീറ്റതില്‍ നന്ദു പ്രകാശ് (18), ആറ്റിങ്ങല്‍ കടുവേലില്‍ കടമ്പാട് ക്ഷേത്രത്തിനു സമീപം ചരുവിളപുത്തന്‍ വീട്ടില്‍നിന്ന് ബന്ധുവീടായ പൊത്തപ്പള്ളി തെക്ക് കുറപ്പറമ്പില്‍ വീട്ടില്‍ താമസിക്കുന്ന വിഷ്ണുവെന്ന് വിളിക്കുന്ന അനന്തപത്മനാഭന്‍ (18) എന്നിവരെയാണ് മാരകായുധങ്ങളുമായി ഞായറാഴ്ച രാത്രി പോലീസ്  പിടികൂടിയത്. ഇവരില്‍ നിന്ന് ലഭിച്ച വിവരത്തിന്റെ അടിസ്ഥാനത്തില്‍ സംഘാംഗമായ വെട്ടുവേനി ലക്ഷ്മി ഭവനില്‍ റിഷിജിത്തി (24)നേയും പോലീസ് അറസ്റ്റു ചെയ്തു. ഏപ്രില്‍ ഒന്‍പതിന് കുമാരപുരത്തെ കവറാട്ട് ക്ഷേത്രത്തില്‍നിന്ന് ഉല്‍സവം കഴിഞ്ഞു പോവുകയായിരുന്ന  വിഷ്ണുവെന്ന യുവാവിനെ പ്രകോപനങ്ങളൊന്നുമില്ലാതെ കുത്തി ഗുരുതരമായി പരുക്കേല്‍പ്പിച്ച കേസിലെ പ്രതിയാണ് ആദിത്യന്‍.കൂട്ടു പ്രതിയായ കിഷോര്‍ ഇപ്പോഴും ഒളിവിലാണ്. പൊത്തപ്പള്ളി തെക്ക് പാലത്തറയില്‍ വിശാഖിനെ വെട്ടി ഗുരുതരമായി പരുക്കേല്‍പ്പിച്ച എഴംഗ സംഘത്തില്‍ പിടിയിലായ നന്ദു പ്രകാശ്, റിഷിജിത്ത് എന്നിവരുണ്ടായിരുന്നു.  വധ ശ്രമങ്ങളടക്കം നിരവധി അക്രമസംഭവങ്ങളില്‍ പ്രതികളാണ് പിടിയിലായവര്‍. ഇവര്‍ക്ക് നിരവധി കൊലക്കേസുകളില്‍ പ്രതിയായി ഗുണ്ടാലിസ്റ്റില്‍പ്പെട്ട് ജയിലിലായവരുടെ സംഘങ്ങളുമായി അടുത്തബന്ധമാണുള്ളതെന്ന്  പോലീസ് പറഞ്ഞു. പ്രകോപനങ്ങളൊന്നുമില്ലെങ്കിലും മാരകായുധങ്ങള്‍ ഉപയോഗിച്ച് ആളുകളെ ആക്രമിക്കാന്‍ യാതൊരു മടിയുമില്ലാത്തവരാണ് പിടിയിലായവരെന്നും ഇവരുടെ സംഘത്തിലുള്ള മറ്റുള്ളവരെയും ഉടന്‍ അറസ്റ്റു ചെയ്യുമെന്നും  ഹരിപ്പാട് സി.ഐ ആര്‍ ജോസ് പറഞ്ഞു. എസ്.ഐ എസ്.എസ് ബൈജു, സി.പി.ഒ മാരായ നിഷാദ്, ശ്രീകുമാര്‍, അനീഷ്, സുഭാഷ് എന്നിവരുടെ നേതൃത്വത്തിലായിരുന്നു ഇവരെ പിടികൂടിയത്.
ഹരിപ്പാട് ജുഡിഷ്യല്‍ ഒന്നാം ക്‌ളാസ് മജിസ്‌ട്രേറ്റ് കോടതിയില്‍ ഹാജരാക്കിയ പ്രതികളെ റിമാന്റു ചെയ്തു.