തലശ്ശേരി: കുട്ടിമാക്കൂലിലെ രാജന്റെ പെണ്‍മക്കള്‍ക്കു സുരക്ഷിതമായി ജീവിക്കാന്‍ പ്രയാസമുണ്ടെന്നു ബോധ്യമായതായും വിഷയത്തില്‍ അടിയന്തരമായി ഇടപെടുമെന്നും വനിതാകമ്മിഷന്‍. സി.പി.എം പ്രവര്‍ത്തകരെ അക്രമിച്ചെന്ന പരാതിയില്‍ കൈക്കുഞ്ഞുമായി ജയിലില്‍ കഴിയേണ്ടിവരികയും അപമാനം സഹിക്കാതെ ആത്മഹത്യയ്ക്കു ശ്രമിക്കുകയും ചെയ്ത പെണ്‍കുട്ടികളുടെ വീടുകള്‍ സന്ദര്‍ശിച്ചശേഷം വനിതാകമ്മിഷന്‍ ചെയര്‍പേഴ്‌സണ്‍ റോസക്കുട്ടി ടീച്ചറാണ് ഇക്കാര്യം വ്യക്തമാക്കിയത്.

വിവാഹം കഴിയാത്ത പെണ്‍കുട്ടിയാണ് അഞ്ജന. ഇവര്‍ തനിക്കും കുടുംബത്തിനും നേരെയുണ്ടായ അപമാനഭാരത്താലാണ് ആത്മഹത്യയ്ക്കു ശ്രമിച്ചത്. ഇതിനെ വളരെ ഗൗരവത്തോടെയാണ് കമ്മിഷന്‍ കാണുന്നത്. ദുര്‍ബലരായ പെണ്‍കുട്ടികള്‍ പാര്‍ട്ടി ഓഫിസില്‍ കയറി അക്രമിച്ചുവെന്നു പറയുന്നതു വിചിത്രമാണ്.

ഇല്ലാത്ത സംഭവങ്ങളുടെ പേരിലാണ് ഇവര്‍ക്കെതിരേ പൊലിസ് കേസെടുത്ത്. കേസ് എടുത്തതിനുശേഷവും അവരോട് പെരുമാറുന്നതു വളരെ മോശമായിട്ടാണ്. സംഭവം സംബന്ധിച്ചു പട്ടികജാതി കമ്മിഷനും പൊലിസും കേസെടുത്തിട്ടുണ്ട്. കേസിനെക്കുറിച്ച് വനിതാകമ്മിഷന്‍ പൊലിസിനോട് റിപ്പോര്‍ട്ട് തേടും. വനിതാകമ്മിഷനും സംഭവത്തില്‍ കേസെടുത്തു മേല്‍ നടപടി സ്വീകരിക്കുമെന്നും റോസക്കുട്ടി ടീച്ചര്‍ പറഞ്ഞു.

സംഭവത്തില്‍ മുഖ്യമന്ത്രി പ്രതികരിക്കാത്തത് അന്വേഷിക്കേണ്ട വിഷയമാണെന്നും ആഭ്യന്തരമന്ത്രിയുടെകൂടി ചുമതല വഹിക്കുന്ന മുഖ്യമന്ത്രി ഇക്കാര്യത്തില്‍ പ്രതികരിക്കാതിരുന്നത് തെറ്റായിപ്പോയെന്നും മാധ്യമപ്രവര്‍ത്തകരുടെ ചോദ്യത്തിനു കമ്മിഷന്‍ പ്രതികരിച്ചു. ദലിത് പെണ്‍കുട്ടികള്‍ക്ക് നേരെ ഇത്തരം സംഭവങ്ങളുണ്ടായതിനെ കമ്മിഷന്‍ രാഷട്രീയമായി കാണാതെ നടപടി സ്വീകരിക്കും.