ലോസ്ആഞ്ചല്‍സ്: ഹോളിവുഡ് നടന്‍ ആന്റണ്‍ യെല്‍ചിന്‍(27) വാഹനാപകടത്തില്‍ മരിച്ചു. സ്റ്റാര്‍ട്രെക് എന്ന സിനിമയിലൂടെ ശ്രദ്ധേയനായ യെല്‍ചിന്‍ ലോസ്ആഞ്ചല്‍സിലുണ്ടായ വാഹനാപകടത്തിലാണു മരിച്ചത്. പരമ്പരയിലെ അടുത്തചിത്രം ജൂലൈ 22ന് റിലീസ് ചെയ്യാനിരിക്കെയാണ് അപകടം.

ഞായറാഴ്ച പുലര്‍ച്ചെ 1.10ഓടെ ലോസ് ആഞ്ചല്‍സിലെ സ്റ്റുഡിയോ സിറ്റി ഹോമിലുള്ള കയറ്റത്തില്‍ കാര്‍ പാര്‍ക്ക് ചെയ്ത ശേഷം തിരിച്ചു വരുന്നതിനിടെ സ്വന്തം കാര്‍ തന്നെ പിന്നോട്ട് വന്ന് അന്റണിനെ ഇടിക്കുകയായിരുന്നു. ഇടിയുടെ ആഘാതത്തില്‍ കാറിനൊപ്പം പുറകിലേക്ക് പോയ അന്റണ്‍ കാറിനും മതിലിനും ഇടയില്‍പ്പെട്ടാണു മരിച്ചത്. പഴയകാല സിനിമകളില്‍ വാള്‍ട്ടര്‍ കോയിങ് അഭിനയിച്ച 'പാവെല്‍ ചെകോവ്' എന്ന വേഷമാണ് യെല്‍ചിനു പ്രേക്ഷകശ്രദ്ധ നേടിക്കൊടുത്തത്. ഇതിനു പുറമെ ലൈക്ക് ക്രേസി(2011), ഗ്രീന്‍ റൂം(2015) തുടങ്ങിയ ചലച്ചിത്രങ്ങളിലും യെല്‍ചിന്‍ അഭിനയിച്ചിട്ടുണ്ട്.