അമൃത്‌സര്‍: ബി.ജെ.പി അകാലിദള്‍ സഖ്യത്തില്‍ നിന്ന് പഞ്ചാബ് കോണ്‍ഗ്രസ് തിരിച്ചുപിടിച്ചു. ആകെയുള്ള 117 സീറ്റില്‍ 73 സീറ്റ് കോണ്‍ഗ്രസ് പിടിച്ചെടുത്തപ്പോള്‍ ശിരോമണി അകാലിദള്‍-ബിജെ.പി സഖ്യത്തിന് 18 സീറ്റുകള്‍ മാത്രമേ നേടാനായിട്ടുള്ളൂ. 26 സീറ്റുമായി ആം ആദ്മി വന്‍ മുന്നേറ്റമാണ് നടത്തിയത്.

ക്യാപ്റ്റന്‍ അമരീന്ദര്‍ സിങിന്റെ നേതൃത്വത്തിലായിരുന്നു പഞ്ചാബില്‍ കോണ്‍ഗ്രസിന്റെ തെരഞ്ഞെടുപ്പ് പ്രചാരണം. അദ്ദേഹത്തിന് 75 വയസ്സ് പൂര്‍ത്തിയാകുന്ന വേളയില്‍ ഇരട്ടി മധുരമായാണ് തെരഞ്ഞെടുപ്പ് ഫലമെത്തിയത്. പട്യാലയില്‍ നിന്ന ജനവിധി തേടിയ അമരീന്ദര്‍ സിങ് മികച്ച ഭൂരിപക്ഷത്തിനാണ് വിജയിച്ചത്.

അതേ സമയം, ആം അദ്മി പഞ്ചാബില്‍ മികച്ച മുന്നേറ്റം നടത്തുമെന്ന് എക്‌സിറ്റ്‌പോള്‍ പ്രവചനത്തിലുണ്ടായിരുന്നു. അത് ശരിവെക്കുന്ന ഫലം തന്നെയാണ് പുറത്തുവന്നത്. എക്‌സിറ്റ് പോള്‍ പ്രവചനങ്ങള്‍ക്കപ്പുറത്തേക്ക് ബി.ജെ.പിക്ക് ഇവിടെ ഒന്നും നേടാനായില്ല.