ഇംഫാല്‍: രാഷ്ട്രീയത്തില്‍ കന്നിയങ്കത്തിനിറങ്ങിയ മണിപ്പൂരിന്റെ ഉരുക്കുവനിത ഇറോം ശര്‍മിളയ്ക്ക് ദയനീയ തോല്‍വി. ശര്‍മിളയെ 5370 വോട്ടിനാണ് നിലവിലെ മുഖ്യമന്ത്രിയായ ഒക്രം ഇബോബി സിങ് തോല്‍പ്പിച്ചത്. ഇറോം ശര്‍മിളക്ക് തൗബാല്‍ മണ്ഡലത്തില്‍ ലഭിച്ചത് കേവലം 90 വോട്ടുകള്‍ മാത്രമാണ്. ഇബോബി സിംങിന് 18649 വോട്ടുകള്‍ ലഭിച്ചു. അതേസമയം നോട്ടക്ക് 143 പേര്‍ വോട്ടു ചെയ്തു.

മണിപ്പൂരിലെ പ്രത്യേക സൈനിക അധികാരനിയമത്തിനെതിര 16 വര്‍ഷം നീണ്ട നിരാഹാര സമരം അവസാനിപ്പിച്ചു പീപ്പിള്‍ റീസര്‍ജന്‍സ് ആന്‍ഡ് ജസ്റ്റിസ് അലയന്‍സ് എന്ന പാര്‍ട്ടിയുമായാണ് ഇറോം ശര്‍മിള തെരഞ്ഞെടുപ്പിനെ നേരിടാനിറങ്ങിയത്.

മണിപ്പൂരില്‍ യൂണൈറ്റഡ് നാഗാ കൗണ്‍സിലിന്റെ സാമ്പത്തിക ഉപരോധത്തിന്റെ പേരില്‍ രാഷ്ട്രീയ മുതലെടുപ്പു നടത്തുന്ന ബിജെപിയും ഭരണകക്ഷിയായ കോണ്‍ഗ്രസും തമ്മിലാണ് പ്രധാനമായും മത്സരം.