പാലാ: മൂന്നുമാസം കൊണ്ട് ഏഴ് വാഹനങ്ങള്‍ കവര്‍ന്ന മൂന്നംഗ കുട്ടിമോഷ്ടാക്കള്‍ പിടിയില്‍. പാലായിലും സമീപ പ്രദേശങ്ങളിലുമുള്ള കുട്ടി സംഘമാണ് പിടിയിലായത്. ഒമ്പതാം ക്ലാസുകാരനാണ് സംഘത്തിന്റെ നേതാവ്. രണ്ടു കാറും അഞ്ച് ബൈക്കുമാണ് പാലാ, തൊടുപുഴ, കുറവിലങ്ങാട്,കിടങ്ങൂര്‍ എന്നിവിടങ്ങളില്‍ നിന്നായി മോഷ്ടിച്ചത്.
മോഷ്ടിച്ച വാഹനങ്ങള്‍ വില്‍ക്കാന്‍ ശ്രമിച്ചങ്കിലും രേഖകള്‍ കൈവശമില്ലാത്തതിനാല്‍ ആരും വാങ്ങാന്‍ തയാറായില്ല. വാഹനങ്ങള്‍ മുത്തോലി ടെക്‌നിക്കല്‍ സ്‌കൂളിന് സമീപം കുറ്റിക്കാടിനുള്ളില്‍ ഒളിപ്പിച്ചു വച്ചിരിക്കുകയായിരുന്നു.ആവശ്യമുള്ളപ്പോള്‍ ഇവിടെയെത്തി എടുത്തുകൊണ്ടുപോകും. താക്കോല്‍ സഹിതം വഴിയരുകില്‍ വച്ചിരുന്ന വാഹനങ്ങളാണ് സംഘം കവര്‍ന്നത്. മോഷ്ടിച്ച വാഹനങ്ങളില്‍ കറങ്ങി നടന്ന് ചെറിയ മോഷണങ്ങളും നടത്തിയിരുന്നു. പാലാ മുനിസിപ്പല്‍ ചെയര്‍മാന്റെ വീട്ടിലെ ബൈക്കും സംഘം കഴിഞ്ഞ ദിവസം മോഷ്ടിച്ചിരുന്നു. ഇതു സംബന്ധിച്ച് അന്വേഷണം ആരംഭിച്ചിരുന്നു.
പഴയ വാഹന വില്‍പന നടത്തുന്ന സ്ഥാപനങ്ങളെ കേന്ദ്രീകരിച്ച് പൊലിസ് നടത്തിയ അന്വേഷണത്തിലാണ് കുട്ടി മോഷ്ടാക്കള്‍ കുടുങ്ങിയത്. ഡി.വൈ.എസ്.പി വി.ജി.വിനോദ് കുമാര്‍, സി.ഐ ടോമി സെബാസ്റ്റ്യന്‍, എസ്.ഐ അഭിലാഷ് കുമാര്‍, രാധാകൃഷ്ണന്‍, തോമസ്, മഹേഷ്, നിധിന്‍ എന്നിവരടങ്ങുന്ന സംഘമാണ് ഇവരെ പിടികൂടിയത്.