തൃശൂര്‍: കോര്‍പ്പറേഷന്‍ ആശുപത്രിയിലെ ജനറല്‍ വാര്‍ഡില്‍ നിന്നും യുവതിയുടെ ബാഗ് തട്ടിപ്പറിച്ചുകൊണ്ടോടിയ യുവാവിനെ നാട്ടുകാര്‍ പിടികൂടി പൊലിസിലേല്‍പ്പിച്ചു.
മുളയം സ്വദേശി മനു എന്ന മനോജിനെ(38)യാണ് നാട്ടുകാര്‍ പിടികൂടിയത്. വെള്ളിയാഴ്ച രാത്രിയായിരുന്നു സംഭവം. അന്തിക്കാട് അരിമ്പൂര്‍ സ്വദേശിനി അജിത(39)യുടെ ബാഗാണ് ഇയാള്‍ തട്ടിപ്പറിച്ചെടുത്തു കൊണ്ടോടിയത്. ബാഗില്‍ മൊബൈല്‍ ഫോണും പണവും ആശുപത്രി രേഖകളുമുണ്ടായിരുന്നു.
ഉടന്‍ സ്ത്രീ ബഹളം വെക്കുകയും മറ്റു രോഗികളുടെ ബന്ധുക്കളും ആശുപത്രിയിലുണ്ടായിരുന്നവരും ചേര്‍ന്ന് ഇയാളെ പിന്തുടര്‍ന്ന് പിടികൂടുകയും കണ്‍ട്രോള്‍ റൂമില്‍ വിവരമറിയിക്കുകയുമായിരുന്നു. തുടര്‍ന്ന് ഈസ്റ്റ് എസ്.ഐയും സംഘവുമെത്തി ഇയാളെ കസ്റ്റഡിലെടുക്കുകയായിരുന്നു. 18 വയസുവരെ മനോജ് അനാഥാലയത്തിലാണ് കഴിഞ്ഞത്.
പ്രായപൂര്‍ത്തിയായതിനെ തുടര്‍ന്ന് ഇവിടെ നിന്നും പുറത്തിറങ്ങിയ ശേഷം തൃശൂര്‍ നഗരത്തില്‍ ചെറിയ മോഷണങ്ങളും മറ്റുമായി കഴിയുകയായിരുന്നു. നേരത്തെ ഇത്തരം പോക്കറ്റടി കേസുകളില്‍ ഇയാള്‍ പൊലിസിന്റെ പിടിയിലായിട്ടുണ്ട്.