കോഴിക്കോട്: സമസ്ത കേരള ജംഇയ്യത്തുല്‍ ഉലമയും കാന്തപുരം വിഭാഗം സുന്നികളും തമ്മിലുള്ള ഐക്യചര്‍ച്ചയുടെ മുന്നോടിയായി മഹല്ലുകളിലും പള്ളി, മദ്‌റസ തുടങ്ങിയ സ്ഥാപനങ്ങളിലും നിലനില്‍ക്കുന്ന പ്രശ്‌നങ്ങള്‍ പരിഹരിക്കുകയും മേലില്‍ പ്രശ്‌നങ്ങള്‍ ഉണ്ടാക്കാതിരിക്കുകയും ചര്‍ച്ച തുടങ്ങിയ ശേഷം പുതിയ പ്രശ്‌നങ്ങള്‍ ഉണ്ടായ സ്ഥലങ്ങളില്‍ അവ ഉണ്ടാക്കിയവര്‍ തന്നെ അതില്‍നിന്ന് പിന്‍മാറുകയും ചെയ്യേണ്ടതാണെന്നും തര്‍ക്കത്തിലിരിക്കുന്ന വിഷയങ്ങളില്‍ ഉചിതമായ തീരുമാനങ്ങള്‍ കൈക്കൊള്ളേണ്ടതാണെന്നും ബുധനാഴ്ച കോഴിക്കോട്ട് ചേര്‍ന്ന മുശാവറ യോഗം തീരുമാനിച്ചു.

വരക്കല്‍ മുല്ലക്കോയ തങ്ങള്‍, ശംസുല്‍ ഉലമ ഇ.കെ ഉസ്താദ്, കണ്ണിയത്ത് ഉസ്താദ്, കോട്ടുമല ഉസ്താദ് അടുത്തകാലത്ത് വിട്ടുപിരിഞ്ഞ കാളമ്പാടി ഉസ്താദ്, കോയക്കുട്ടി ഉസ്താദ്, കുമരംപുത്തൂര്‍ ഉസ്താദ്, ചെറുശ്ശേരി ഉസ്താദ് തുടങ്ങിയവര്‍വരെയുള്ള സമസ്തയെ നയിച്ച സച്ചരിതരായ ഉസ്താദുമാരും നേതാക്കളും നിലനിര്‍ത്തിപ്പോന്ന പരിശുദ്ധ ആദര്‍ശത്തിനോ അവര്‍ കാണിച്ചു തന്ന സല്‍പാന്ഥാവിനോ യാതൊരുവിധ കോട്ടവും തട്ടാത്ത വിധത്തില്‍ വ്യവസ്ഥാപിതമായി മാത്രമേ ഐക്യചര്‍ച്ചകള്‍ നടത്താവൂ എന്ന് പാണക്കാട് സയ്യിദ് ഹൈദരലി ശിഹാബ് തങ്ങള്‍ നിര്‍ദേശിച്ചു.
കൂടാതെ തെറ്റിദ്ധാരണാപരമായ വാര്‍ത്തകളില്‍ പ്രവര്‍ത്തകര്‍ വഞ്ചിതരാവരുതെന്നും അനാവശ്യമായ പരാമര്‍ശങ്ങള്‍ ഒഴിവാക്കി സമസ്തയുടെ പ്രവര്‍ത്തനങ്ങള്‍ ശക്തിപ്പെടുത്തണമെന്നും യോഗം അഭ്യര്‍ഥിച്ചു.
സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ അധ്യക്ഷനായി. പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനംചെയ്തു.
കെ. ആലിക്കുട്ടി മുസ്‌ലിയാര്‍ സ്വാഗതം പറഞ്ഞു. പി.കെ.പി അബ്ദുസ്സലാം മുസ്‌ലിയാര്‍, സി.കെ.എം സ്വാദിഖ് മുസ്‌ലിയാര്‍,എം.ടി അബ്ദുല്ല മുസ്‌ലിയാര്‍, പി.പി ഉമര്‍ മുസ്‌ലിയാര്‍, എം.എം മുഹ്‌യിദ്ദീന്‍ മുസ്‌ലിയാര്‍, വില്യാപള്ളി ഇബ്‌റാഹീം മുസ്‌ലിയാര്‍, കെ.ടി ഹംസ മുസ്‌ലിയാര്‍, എം.എ ഖാസിം മുസ്‌ലിയാര്‍, ഒ. മുഹമ്മദ് എന്ന കുട്ടി മുസ്‌ലിയാര്‍, ചേലക്കാട് മുഹമ്മദ് മുസ്‌ലിയാര്‍, എം.കെ മൊയ്തീന്‍കുട്ടി മുസ്‌ലിയാര്‍, കെ.പി.സി തങ്ങള്‍ വല്ലപ്പുഴ, എം.പി കുഞ്ഞിമുഹമ്മദ് മുസ്‌ലിയാര്‍, ത്വാഖാ അഹ്മദ് മുസ്‌ലിയാര്‍, വാവാട് കുഞ്ഞിക്കോയ മുസ്‌ലിയാര്‍, വി മൂസക്കോയ മുസ്‌ലിയാര്‍, എ. മരക്കാര്‍ മുസ്‌ലിയാര്‍,പി. കുഞ്ഞാണി മുസ്‌ലിയാര്‍,കെ. ഹൈദര്‍ ഫൈസി, ഡോ. ബഹാഉദ്ദീന്‍ മുഹമ്മദ് നദ്‌വി, വാക്കോട് മൊയ്തീന്‍കുട്ടി ഫൈസി, കെ. ഉമര്‍ ഫൈസി മുക്കം, എ.വി അബ്ദുറഹ്മാന്‍ മുസ്‌ലിയാര്‍, കെ.കെ.പി അബ്ദുല്ല മുസ്‌ലിയാര്‍, എസ്.എം.കെ തങ്ങള്‍, ചെറുവാളൂര്‍ പി.എസ് ഹൈദ്രോസ് മുസ്‌ലിയാര്‍, ഇ.എസ് ഹസന്‍ ഫൈസി എന്നിവര്‍ ചര്‍ച്ചയില്‍ പങ്കെടുത്തു.