ലഖ്‌നൗ: ഉത്തര്‍പ്രദേശില്‍ തെരഞ്ഞെടുപ്പില്‍ ബി.ജെ.പി കൃത്രിമം കാണിച്ചതായി ബി.എസ്.പി അധ്യക്ഷ മായാവതി ആരോപിച്ചു. ഏതു കക്ഷിക്ക് വോട്ട് ചെയ്താലും ബി.ജെ.പിക്ക് വോട്ടായി മാറുന്ന തരത്തില്‍ യന്ത്രം ക്രമീകരിച്ചിരുന്നെന്നും തെരഞ്ഞെടുപ്പ് മാറ്റിനടത്തണമെന്നും അവര്‍ ആവശ്യപ്പെട്ടു. ഉത്തര്‍പ്രദേശ് തെരഞ്ഞെടുപ്പ് ഫലങ്ങള്‍ പുറത്തുവന്നയുടന്‍ ഇന്നലെ ഉച്ചയോടെയാണ് ആരോപണവുമായി അവര്‍ രംഗത്തെത്തിയത്.
ഒന്നുകില്‍ ഇലക്ട്രോണിക് വോട്ടിങ് മെഷിനുകള്‍(ഇ.വി.എം) ബി.ജെ.പിയുടേതല്ലാത്ത വോട്ടുകളൊന്നും സ്വീകരിച്ചില്ല. അല്ലെങ്കില്‍ മറ്റുപാര്‍ട്ടികളുടെ വോട്ട് ബി.ജെ.പിയിലേക്കു പോയിട്ടുണ്ട്. മുസ്‌ലിംകള്‍ ബി.ജെ.പിയെ പിന്തുണച്ചിട്ടില്ല. പിന്നെ എങ്ങനെ മുസ്‌ലിം ഭൂരിപക്ഷ മണ്ഡലങ്ങളില്‍ വരെ അവര്‍ വന്‍ വിജയം നേടിയെന്നും മായാവതി ചോദിച്ചു.തെരഞ്ഞെടുപ്പ് പരാജയം അംഗീകരിക്കാനാകില്ലെന്നും അവര്‍ പറഞ്ഞു. വോട്ടര്‍മാര്‍ക്ക് ബാലറ്റ് പേപ്പര്‍ നല്‍കി തെരഞ്ഞെടുപ്പ് മാറ്റിനടത്തണമെന്ന ആവശ്യവുമായി മായാവതി തെരഞ്ഞെടുപ്പ് കമ്മിഷന് കത്തയച്ചിട്ടുണ്ട്.