കൊല്ലം: ശാരീരിക വൈകല്യമുള്ളതും സംസാരിശേഷി ഇല്ലാത്തതുമായ ലോട്ടറി വില്‍പനക്കാരനില്‍ നിന്നും പണം അപഹരിച്ച രണ്ടുപേരെ കൊല്ലം ഈസ്റ്റ് പൊലിസ് പിടികൂടി. തിരുവനന്തപുരം പള്ളിക്കല്‍ കല്ലറക്കോണം നിയാസ് ഭവനത്തില്‍ സലീം(54), തിരുവനന്തപുരം വിളപ്പില്‍ കാഞ്ഞിരകോട് വട്ടവിള പുത്തന്‍വീട്ടില്‍ സേവ്യര്‍(53) എന്നിവരാണ് പിടിയിലായത്.
മയ്യനാട് മുട്ടം സ്വദേശി അയ്യൂബ്ഖാന്റെ പക്കല്‍ സൂക്ഷിച്ചിരുന്ന മൂവായിരം രൂപയടങ്ങിയ ബാഗ് കൊല്ലം കെ.എസ്.ആര്‍.ടി.സി ബസ് സ്റ്റാന്റില്‍ നിന്ന് അപഹരിക്കുകയായിരുന്നുവെന്നാണ് പരാതി. ഇതിന്റെ അടിസ്ഥാനത്തില്‍ പ്രതികളെ പിടികൂടുകയായിരുന്നു. കൊല്ലം എ.സി.പി ജോര്‍ജ്ജ് കോശിയുടെ നിര്‍ദ്ദേശപ്രകാരം ഈസ്റ്റ് സി.ഐ മഞ്ചുലാല്‍, എസ്.ഐ രൂപേഷ് രാജ്, അഡീ. എസ്.ഐ മുഹമ്മദ് ബഷീര്‍, എ.എസ്.ഐ സുരേഷ്‌കുമാര്‍, സി.പി.ഒ ഓമനക്കുട്ടന്‍ എന്നവരടങ്ങിയ സംഘമാണ് പ്രതികളെ പിടികൂടിയത്. പ്രതികളെ കോടതിയില്‍ ഹാജരാക്കി റിമാന്റ് ചെയ്തു.