സുല്‍ത്താന്‍ ബത്തേരി: തുടര്‍ച്ചയായി നൂറില്‍ നൂറുമനി വിജയം കൊയ്ത് കല്ലൂര്‍ രാജീവ് ഗാന്ധി മോഡല്‍ റസിഡന്‍ഷ്യല്‍ സ്‌കൂളിലെ (ആര്‍ജി.എം.ആര്‍.എച്ച്.എസ്.എസ് നൂല്‍പ്പുഴ) കാട്ടുനായ്ക്ക വിദ്യാര്‍ഥികള്‍. ഇത്തവണ എസ്.എസ്.എല്‍.സി പരീക്ഷ എഴുതിയ 34 വിദ്യാര്‍ഥികളും വിജയിച്ചു. 20 പെണ്‍കുട്ടികളും 14 ആണ്‍കുട്ടികളുമാണ് പരീക്ഷ എഴുതിയത്.
പരീക്ഷ എഴുതിയ കുട്ടികള്‍ മികച്ച വിജയശതമാനത്തിലാണ് വിജയിച്ചത്. ഏഴ് എ പ്ലസ് നേടി രാഹുല്‍ സ്‌കൂളില്‍ ഒന്നാമതായി. രണ്ടു പേര്‍ക്ക് ആറ് എ പ്ലസും ലഭിച്ചു. കഴിഞ്ഞ വര്‍ഷവും പരീക്ഷ എഴുതിയ 29 പേര്‍ ഉപരി പഠനത്തിന് അര്‍ഹത നേടിയിരുന്നു.
2001 ലാണ് ആദ്യ എസ്.എസ്.എല്‍.സി ബാച്ച് സ്‌കൂളില്‍ ആരംഭിച്ചത്. തുടര്‍ന്ന് രണ്ട് തവണ മാത്രമാണ് നൂറ് ശതമാനം വിജയം കൈവിട്ട് പോയത്. അതും 2005 ന് മുന്‍പ്. പിന്നീടുള്ള വര്‍ഷങ്ങളിലെല്ലാം നൂറുമേനിയാണ് സ്‌കൂളിലെ വിജയം. പൊതുവെ പഠനകാര്യത്തില്‍ പിന്നാക്കം നില്‍ക്കുന്ന കാട്ടുനായ്ക്ക വിഭാഗത്തിലെ കുട്ടികള്‍ക്ക് നിരന്തര പരിശീലനം നല്‍കിയാണ് ഉന്നത വിജയം നേടാന്‍ യോഗ്യരാക്കിയത്. പരാധീനതകള്‍ക്ക് നടുവിലാണ് സ്‌കൂളിന്റെ തിളക്കമുള്ള നേട്ടം.