മഡ്ഗാവ്: 71ാമത് സന്തോഷ് ട്രോഫി ഫുട്‌ബോള്‍ ടൂര്‍ണമെന്റ് ഫൈനല്‍ റൗണ്ട് പോരാട്ടങ്ങള്‍ക്കു ഇന്നു ഗോവയില്‍ കിക്കോഫ്. ഇന്നു മുതല്‍ 21 വരെ ക്വാര്‍ട്ടര്‍ ലീഗ് മത്സരങ്ങളും 23നു സെമി പോരാട്ടവും 26നു ഫൈനലും നടക്കും. ഇന്നു രണ്ടു മത്സരങ്ങളാണു അരങ്ങേറുന്നത്.
പത്തു ടീമുകളെ അഞ്ചു വീതമുള്ള രണ്ടു പൂളുകളാക്കി തിരിച്ചാണ് മത്സരങ്ങള്‍. പൂള്‍ എയില്‍ പശ്ചിമ ബംഗാള്‍, മേഘാലയ, സര്‍വിസസ്, ഗോവ, ചണ്ഡീഗഢ് ടീമുകളാണുള്ളത്. പൂള്‍ ബിയിലാണു കേരളം. കേരളത്തെ കൂടാതെ പഞ്ചാബ്, റെയില്‍വേസ്, മിസോറം, മഹാരാഷ്ട്ര ടീമുകളും രണ്ടാം പൂളിലുണ്ട്.
ആദ്യ മത്സരത്തില്‍ ആതിഥേയരായ ഗോവ- മേഘാലയയുമായും കരുത്തരായ പശ്ചിമ ബംഗാള്‍- ചണ്ഡീഗഢിനേയും നേരിടും.
കേരളത്തിന്റെ ആദ്യ മത്സരം ഈ മാസം 15നു റെയില്‍വേസിനെതിരേയാണ്. ഉസ്മാന്റെ നേതൃത്വത്തിലുള്ള 20 ടീമാണു കേരളത്തിനായി അണിനിരക്കുന്നത്.
ഇതു നാലാം തവണയാണു ഗോവ സന്തോഷ് ട്രോഫിക്ക് ആതിഥേയത്വം വഹിക്കുന്നത്.