കാളികാവ്: മലയോരത്ത് വിജയ ശതമാനം ഉയര്‍ന്നു. എ.എച്ച്.എസ് പാറല്‍ മമ്പാട്ടുമൂല സ്‌കൂളും അഞ്ചച്ചവിടി ഗവ.ഹൈസ്‌കൂളിലും നൂറുമേനി. എ.എച്ച്.എസ് പാറല്‍ മമ്പാട്ടുമൂല സ്‌കൂളില്‍ 338 കുട്ടികളാണ് പരീക്ഷ എഴുതിയത്. 25 കുട്ടികള്‍ മുഴുവന്‍ വിഷയങ്ങള്‍ക്കും എ പ്ലസ് നേടി. വണ്ടൂര്‍ വിദ്യാഭ്യാസ ജില്ലയില്‍ തന്നെ വിജയ നിലവാരത്തില്‍ പാറല്‍ മമ്പാട്ടുമല മൂന്നാം സ്ഥാനം നേടി. അരീക്കോടും കാവനൂരുമാണ് ഒന്നും രണ്ടും സ്ഥാനങ്ങള്‍ നേടിയിട്ടുള്ളത്.
അഞ്ചച്ചവിടി ഗവ. ഹൈസ്‌കൂള്‍ മൂന്നാം തവണയും നൂറുമേനി നിലനിര്‍ത്തി. ആര്‍.എം.എസ്.എ പദ്ധതി പ്രകാരം ഹൈസ്‌കൂളാക്കി ഉയര്‍ത്തിയ അഞ്ചച്ചവിടി സ്‌കൂളിലെ ആദ്യ എസ്.എസ്.എല്‍.സി ബാച്ച് പുറത്തിറങ്ങിയത് 2010ലാണ്. മുഴുവന്‍ വിഷയങ്ങള്‍ക്കും അധ്യാപക തസ്തികപോലും അനുവദിക്കാത്ത വിദ്യാലയം മൂന്നാം വര്‍ഷവും നൂറുമേനി നിലനിര്‍ത്തി. യു.പി സ്‌കൂള്‍ അധ്യാപകരും നാട്ടുകാരുടേയും രക്ഷിതാക്കളുടേയും ഇടപെടലാണ് സ്‌കൂളിന്റെ ഉയര്‍ന്ന വിജയ ശതമാനത്തിലെ പ്രധാന ഘടകം. 120 കുട്ടികളാണ് ഈ വര്‍ഷം പരീക്ഷ എഴുതിയത്. അഞ്ച് കുട്ടികള്‍ മുഴുവന്‍ വിഷയങ്ങള്‍ക്കും എ പ്ലസും ഒന്‍പത് കുട്ടികള്‍ ഒന്‍ത് വിഷയങ്ങള്‍ക്ക് എ പ്ലസും നേടി.
മലയോരത്തെ ഏറ്റവും കൂടുതല്‍ കുട്ടികളെ പരീക്ഷക്കിരുത്തിയ അടയ്ക്കാകുണ്ട് ക്രസന്റ് ഹയര്‍ സെക്കന്‍ഡറി സ്‌കൂള്‍ ചരിത്ര വിജയം നേടി. പരീക്ഷക്കിരുന്ന 659 കുട്ടികളില്‍ 656 പേരും ജയിച്ചു.
മലയോരത്തെ എ പ്ലസ് നേടിയ കുട്ടികളുടെ എണ്ണത്തിലും അടയ്ക്കാകുണ്ട് സ്‌കൂള്‍ തന്നെയാണ് മുന്‍പില്‍. 70 കുട്ടികള്‍ മുഴുവന്‍ വിഷയങ്ങള്‍ക്കും എ പ്ലസ് നേടി. 26 കുട്ടികള്‍ ഒന്‍പത് വിഷയങ്ങള്‍ക്കും എ പ്ലസ് നേടി.
കരുവാരകുണ്ട് ഹയര്‍ സെക്കന്‍ഡറി സ്‌കൂളില്‍ പരീക്ഷ എഴുതിയ 629 കുട്ടികളില്‍ 600 കുട്ടികളും വിജയിച്ചു. 38 കുട്ടികള്‍ മുഴുവന്‍ വിഷയങ്ങള്‍ക്കും എ പ്ലസ് നേടി.
പുല്ലങ്കോട് ഗവ.ഹയര്‍ സെക്കന്‍ഡറി സ്‌കൂളില്‍ പരീക്ഷ എഴുതിയ 239 കുട്ടികളില്‍ 235 കുട്ടികള്‍ വിജയിച്ചു.13 കുട്ടികള്‍ മുഴുവന്‍ വിഷയങ്ങള്‍ക്കും എ പ്ലസ് നേടി. മലയരത്തെ മറ്റ് വിദ്യാലയങ്ങളും ഉയര്‍ന്ന വിജയം നേടിയിട്ടുണ്ട്.