കോവളം: നിര്‍ത്തിയിട്ടിരുന്ന ലോറി മുന്നോട്ടു നീങ്ങി റോഡരികിലെ കുഴിയില്‍ വീണ് രണ്ടുപേര്‍ക്ക് പരുക്കേറ്റു. കഴിഞ്ഞ ദിവം ഉച്ചക്ക് മുട്ടയ്ക്കാട് ശാസ്താ റോഡിന് സമീപത്തായിരുന്നു അപകടം. ഇവിടെയുള്ള കനാലിന്റെ കരയില്‍ നിര്‍ത്തിയിട്ടിരുന്ന ലോറി മുന്നോട്ടു നീങ്ങി കുഴിയില്‍ വീണ ശേഷം സമീപത്തെ  തെങ്ങില്‍ ഇടിക്കുകയായിരുന്നു. ലോറിയില്‍ നിന്ന് ഹോളോബ്രിക്‌സ് ഇറക്കി കൊണ്ടിരുന്ന ബംഗാള്‍ സ്വദേശികളായ അശ്വിന്‍ റോയ് (20) ബാബി (20) എന്നിവര്‍ക്കാണ് പരുക്കേറ്റത്. ഇരുവരെയും വിഴിഞ്ഞം ആശുപത്രിയില്‍ പ്രവേശിപ്പിച്ചു. വെങ്ങാനൂര്‍ ഗ്രാമപ്പഞ്ചായത്തിലെ കോവളം വാര്‍ഡിലെ കോഴിക്കൂട് നിര്‍മ്മാണത്തിനുള്ള പദ്ധതിയ്ക്കായി ഹോളോബ്രിക്‌സ് കയറ്റിവന്ന മിനിലോറിയാണ് അപകടത്തില്‍പ്പെട്ടത്.
ലോറിയുടെ ഡ്രൈവര്‍ കുറച്ചകലെ മറ്റൊരാളുമായി സംസാരിച്ചു നില്‍ക്കുന്നതിനിടെ അതുവഴിയെത്തിയ ഓട്ടോറിക്ഷക്കു കടന്നുപോകാന്‍ സ്ഥലമില്ലെന്നു കണ്ട് ഓട്ടോയിലുണ്ടായിരുന്നവര്‍ ലോറിയില്‍ കയറി സ്റ്റാര്‍ട്ട് ചെയ്തപ്പോഴാണ് അപകടമുണ്ടായതെന്ന് പറയുന്നു. കോവളം പൊലിസ് കേസെടുത്തു.