ബംഗളൂരു: ഗോവധ നിരോധനം തിരികെ കൊണ്ടു വരുമെന്ന് ഉറപ്പു നല്‍കി കര്‍ണാടകയില്‍ ബി.ജെ.പി പ്രകടന പത്രിക. പാര്‍ട്ടി അധികാരത്തില്‍ വന്നാല്‍ സംസ്ഥാനത്ത് ഗോവധ നിരോധനം നടപ്പാക്കുമെന്ന് മുഖ്യമന്ത്രി സ്ഥാനാര്‍ഥി ബി.എസ് യെദിയൂരപ്പ വ്യക്തമാക്കി. ഇതിനായി ഗോവധം നിരോധിച്ചു കൊണ്ടുള്ള 2012ലെ കര്‍ണാടക ഗോവധ നിരോധന ബില്‍ പുനഃസ്ഥാപിക്കുമെന്നും പ്രകടനപത്രികയില്‍ ചൂണ്ടിക്കാട്ടുന്നു.

വാഗ്ദാനപ്പെരുമഴയുമായാണ് ബി.ജെ.പി പ്രകടന പത്രിക പുറത്തിറക്കിയിരിക്കുന്നത്. ദാരിദ്ര്യരേഖക്കു താഴെയുള്ള സ്ത്രീകള്‍ക്ക് ഫ്രീയായി സ്മാര്‍ട്ട് ഫോണുകള്‍ സമ്മാനിക്കുന്ന മുഖ്മന്ത്രി സ്മാര്‍ട്ട് ഫോണ്‍ യോജനയാണ് അതിലൊന്ന്. കര്‍ഷകര്‍ക്കും സ്ത്രീകള്‍ക്കും പരിരക്ഷ നല്‍കുന്ന പദ്ധതികള്‍ക്കും യെദിയൂരപ്പയും അനന്ത്കുമാറും ചേര്‍ന്ന് പുറത്തിറക്കിയ പ്രകടനപത്രികയില്‍ ഊന്നല്‍ നല്‍കിയിരിക്കുന്നു.

സഹകരണ ബാങ്കിലെ ഒരു ലക്ഷം രൂപ വരെയുള്ള കാര്‍ഷിക കടങ്ങള്‍ എഴുതി തള്ളുമെന്നും സ്ത്രീകള്‍ക്ക് ഒരു ശതമാനം പലിശയില്‍ വായ്പ നല്‍കുമെന്നുമാണ് മറ്റൊരു വാഗ്ദാനം. മുഖ്യമന്ത്രിയുടെ ഓഫീസില്‍ പ്രത്യേക കര്‍ഷക സെല്‍ രൂപീകരിക്കും. ലോകായുക്തക്ക് കൂടുതല്‍ അധികാരങ്ങള്‍ നല്‍കുമെന്നും പ്രകടനപത്രികയില്‍ ബി.ജെ.പി വാഗ്ദാനം ചെയ്യുന്നു.

സ്ത്രീസുരക്ഷക്ക് കൂടുതല്‍ ഊന്നല്‍ നല്‍കുമെന്ന് നമോ ആപ്പിലൂടെ പ്രധാനമന്ത്രി നരേന്ദ്ര മോദി വ്യക്തമാക്കി. ഇതിനായി നിയമം കര്‍ക്കശമാക്കും. സ്ത്രീകള്‍ക്കെതിരായ അക്രമങ്ങള്‍ അവസാനിപ്പിക്കുമെന്ന് മോദി ചൂണ്ടിക്കാട്ടുന്നു.