കൊച്ചി: എസ്.എസ്.എല്‍.സി പരീക്ഷയുടെ ഫലം വന്നപ്പോള്‍ എളമക്കര തൈക്കൂട്ടത്തില്‍ ജോസഫിനും ഭാര്യയ്ക്കും സങ്കടം അടക്കാന്‍ കഴിഞ്ഞില്ല. ഫിസിക്‌സ് പരീക്ഷയുടെ അന്ന് ബൈക്കപകടത്തില്‍ മരിച്ച തങ്ങളുടെ പ്രിയ പുത്രന്‍ അക്ഷയ് വര്‍ഗീസിന്റെ പരീക്ഷാഫലം അവര്‍ എവിടെയും അന്വേഷിച്ചില്ല.
നാലു പരീക്ഷ പൂര്‍ത്തിയാക്കി അഞ്ചാമത്തെ പരീക്ഷ എഴുതുന്നതിനുമുമ്പാണ് പൊറ്റക്കുഴി ചെറുപുഷ്പം പള്ളിയിലെത്തി പ്രാര്‍ഥിച്ച ശേഷം സുഹൃത്തിനൊപ്പം മടങ്ങവേ എളമക്കര താന്നിക്കല്‍ ജംഗ്ഷനില്‍വച്ച് അക്ഷയ് അപകടത്തില്‍പ്പെട്ടത്. നിയന്ത്രണംവിട്ട ബൈക്ക് വൈദ്യുതി പോസ്റ്റിലിടിച്ച് മറിഞ്ഞായിരുന്നു അപകടം.
ഇടിയുടെ ആഘാതത്തില്‍ റോഡിലേക്കു തലയിടിച്ചുവീണ അക്ഷയിനെ ഉടന്‍ കൊച്ചിയിലെ സ്വകാര്യ ആശുപത്രിയില്‍ എത്തിച്ചെങ്കിലും മരണപ്പെടുകയായിരുന്നു.ഇന്നലെ പരീക്ഷാഫലം വന്നപ്പോള്‍ അക്ഷയ് എഴുതിയ വിഷയങ്ങള്‍ക്കെല്ലാം മികച്ച വിജയമായിരുന്നു. ഐ.ടിക്ക് എപ്ലസ് നേടിയപ്പോള്‍ മലയാളം രണ്ടാം പേപ്പറിന് എയും മലയാളം ഒന്നാം പേപ്പറിനും ഹിന്ദിക്കും ബി പ്ലസും ലഭിച്ചു.
കലൂര്‍ എ.സി.എസ് ഇംഗ്ലീഷ് മീഡിയം സ്‌കൂളില്‍ ഈ വര്‍ഷം നൂറുമേനി അക്ഷയുടെ മരണത്തോടെ നഷ്ടമായങ്കിലും സ്‌കൂള്‍ അധികൃതര്‍ക്കോ സുഹൃത്തുക്കള്‍ക്കോ പരാതിയുണ്ടായിരുന്നില്ല.