ലണ്ടന്‍: മുന്‍ ഇംഗ്ലണ്ട്, ലിവര്‍പൂള്‍ നായകന്‍ സ്റ്റീവന്‍ ജെറാര്‍ഡ് പരിശീലകനാകുന്നു. സ്‌കോട്ടിഷ് പ്രീമിയേര്‍ഷിപ്പ് ക്ലബ് റെയ്ഞ്ചഴ്‌സിന്റെ കോച്ചായി ജെറാര്‍ഡ് വരുന്ന സീസണില്‍ സ്ഥാനമേല്‍ക്കും. മുന്‍ ഇതിഹാസ മധ്യനിര താരവുമായി റെയ്‌ഞ്ചേഴ്‌സ് കരാറിലെത്തി. നാല് വര്‍ഷത്തേക്കാണ് ജെറാര്‍ഡ് സ്‌കോട്ടിഷ് ടീമിനെ പരിശീലിപ്പിക്കാന്‍ കരാര്‍ ഒപ്പിട്ടത്. ലിവര്‍പൂളില്‍ 17 വര്‍ഷം കളിച്ച ശേഷം അന്താരാഷ്ട്ര ഫുട്‌ബോളില്‍ നിന്ന് വിരമിച്ച 37 കാരനായ ജെറാര്‍ഡിന്റെ കന്നി പരിശീലക കരിയറാണ് റെയ്‌ഞ്ചേഴ്‌സിനൊപ്പം ആരംഭിക്കുന്നത്.
ട്രോട്ട് വിരമിക്കുന്നു
ലണ്ടന്‍: മുന്‍ ഇംഗ്ലണ്ട് ബാറ്റ്‌സ്മാന്‍ ജൊനാതന്‍ ട്രോട്ട് അന്താരാഷ്ട്ര ക്രിക്കറ്റില്‍ നിന്ന് വിരമിക്കുന്നു. ഈ സീസണ്‍ അവസാനത്തോടെയാണ് താരം ക്രിക്കറ്റ് കളത്തോട് വിട പറയുന്നതെന്ന് കൗണ്ടി ടീം വാര്‍വിക്ക്‌ഷെയര്‍ വെളിപ്പെടുത്തി. 37കാരനായ താരം ഇംഗ്ലണ്ടിനായി 52 ടെസ്റ്റുകള്‍ കളിച്ചിട്ടുണ്ട്. 2009, 2010- 11, 2013 വര്‍ഷങ്ങളില്‍ ആഷസ് പരമ്പര വിജയിച്ച ഇംഗ്ലണ്ട് ടീമില്‍ താരം അംഗമായിരുന്നു.
ഒന്‍പത് സെഞ്ച്വറികള്‍ സഹിതം ടെസ്റ്റില്‍ 2,819 റണ്‍സ് ട്രോട്ട് സ്വന്തമാക്കിയിട്ടുണ്ട്. 2003 മുതല്‍ വാര്‍വിക്ക്‌ഷെയറില്‍ കളിക്കുന്ന ട്രോട്ട് ഫസ്റ്റ് ക്ലാസ് മത്സരങ്ങളില്‍ 44 സെഞ്ച്വറികള്‍ സഹിതം 17,750 റണ്‍സ് സമ്പാദിച്ചിട്ടുണ്ട്.