ഇരിക്കൂര്‍: പഞ്ചായത്തിലെ ചെറുകുട്ടാവിലെ പൊതുകിണറ്റില്‍ ഉപ്പുവെള്ളം കയറുന്നു. കുട്ടാവ് പുഴയോരത്ത് വര്‍ഷങ്ങള്‍ക്കു മുന്‍പു ബ്ലോക്കിന്റെ സഹായത്തോടെ കുഴിച്ച കിണറിലാണ് പുഴയില്‍ നിന്നു ഉപ്പുവെള്ളം കയറി ജലം ഉപയോഗശൂന്യമാവുന്നത്. കിണറില്‍ നിറയെ വെള്ളമുണ്ടെങ്കിലും ഉപ്പുകലര്‍ന്ന വെള്ളമായതിനാല്‍ സമീപവാസികള്‍ക്കു ഉപയോഗിക്കാന്‍ സാധിക്കുന്നില്ല. വേലിയേറ്റ സമയത്ത് കടലില്‍ നിന്നു പുഴവെള്ളത്തില്‍ കലരുന്ന ഉപ്പുവെള്ളമാണ് കിണറ്റില്‍ എത്തുന്നത്. ഇതിനെതിരേ നടപടി സ്വീകരിക്കണമെന്നു നാട്ടുകാര്‍ ആവശ്യപ്പെട്ടു.