ആലപ്പുഴ: സംസ്ഥാന യുവജനക്ഷേമ ബോര്‍ഡ് സംഘടിപ്പിക്കുന്ന നാഷണല്‍ യൂത്ത് കോണ്‍കോഡിനോടനുബന്ധിച്ചുള്ള ആര്‍ട്ട് ഡീ ടൂര്‍ നാളെ ജില്ലയില്‍ സഞ്ചരിക്കും. ഇന്ന് രാത്രി ഏഴിന് കായംകുളത്ത് എത്തിച്ചേരുന്ന ആര്‍ട്ട് ഡീ ടൂര്‍ ഞായറാഴ്ച രാവിലെ 9.30ന് ഹരിപ്പാട്, 11ന് അമ്പലപ്പുഴ, വൈകിട്ട് നാലിന് ആലപ്പുഴ, ആറിന് കലവൂര്‍ എന്നിവിടങ്ങളില്‍ പരിപാടികള്‍ അവതരിപ്പിച്ച് രാത്രി ഏഴിന് ചേര്‍ത്തലയില്‍ സമാപിക്കും. തിങ്കളാഴ്ച എറണാകുളം ജില്ലയില്‍ പ്രവേശിക്കുന്ന ആര്‍ട്ട് ഡീ ടൂര്‍ മെയ് 14ന് കാഞ്ഞങ്ങാടാണ് സമാപിക്കുന്നത്.
മന്ത്രിമാരായ ജി. സുധാകരന്‍, തോമസ് ഐസക്, പി. തിലോത്തമന്‍, പ്രതിപക്ഷ നേതാവ് രമേശ് ചെന്നിത്തല, എം.എല്‍.എമാര്‍ വിവിധ സ്ഥലങ്ങളില്‍ പങ്കെടുക്കും. തിരുവനന്തപുരം നഗരത്തില്‍ മാത്രം സര്‍വിസ് നടത്തുന്ന കെ.എസ്.ആര്‍.ടി.സിയുടെ ഡബിള്‍ ഡക്കര്‍ ബസിനുള്ളില്‍ ഒരുക്കിയിട്ടുള്ള മള്‍ട്ടിമീഡിയ കലാപ്രദര്‍ശനമാണ് ആര്‍ട്ട് ഡീ ടൂറിന്റെ പ്രധാന ആകര്‍ഷണം.
സീറ്റുകള്‍ മുഴുവനും എടുത്തുമാറ്റിയാണ് ബസിന്റെ ഇരുനിലയിലും പ്രദര്‍ശനം ഒരുക്കിയിരിക്കുന്നത്. താഴത്തെ നിലയില്‍ പുസ്തകങ്ങള്‍ ഉള്‍പ്പെടുത്തിയുള്ള ഇന്‍സ്റ്റലേഷനാണ്. മുകള്‍ നിലയില്‍ ഫോട്ടോകളും ചിത്രങ്ങളും ഹ്രസ്വചലനചിത്രങ്ങളും പ്രദര്‍ശിപ്പിക്കും. ലളിതകലാ അക്കാദമി പുരസ്‌കാര ജേതാവ് ജി. അജിത് കുമാറിന്റെ നേതൃത്വത്തിലാണ് വാഹനം രൂപകല്‍പന ചെയ്ത് പ്രദര്‍ശനവും ഇന്‍സ്റ്റേലേഷനും സജ്ജീകരിച്ചിരിക്കുന്നത്. ഇരുപതിലേറെ കലാകാരന്മാര്‍ നാടകം, നാടന്‍ പാട്ടുകള്‍, തല്‍സമയ ചിത്രരചന തുടങ്ങിയവയുമായി ഡബിള്‍ ഡക്കര്‍ ബസിനെ അനുഗമിക്കുന്നുണ്ട്.
രണ്ടുനിലകളുള്ള ബസ് എയര്‍ കണ്ടീഷന്‍ ചെയ്താണ് കലാപ്രദര്‍ശനത്തിനായി തയ്യാറാക്കിയിരിക്കുന്നത്. ഇതോടനുബന്ധിച്ച് അഭിപ്രായ സര്‍വേ, ലൈവ് പെര്‍ഫോമന്‍സുകള്‍ തുടങ്ങിയവയും സംഘടിപ്പിക്കുന്നുണ്ട്. അഭിപ്രായ-ആവിഷ്‌കാര സ്വാതന്ത്ര്യങ്ങളുടെ സാംസ്‌കാരിക യാത്രയാണിതെന്ന് യുവജനക്ഷേമ ബോര്‍ഡ് വൈസ് ചെയര്‍മാന്‍ പി. ബിജു പറഞ്ഞു.