തലശ്ശേരി: കുട്ടിമാക്കൂലില്‍ ദലിത് യുവതി ആത്മഹത്യക്ക് ശ്രമിച്ച സംഭവത്തില്‍ പ്രതിചേര്‍ക്കപ്പെട്ട സി.പി.എം നേതാക്കളുടെ പേരില്‍ പട്ടികജാതി പീഡന നിരോധന നിയമ പ്രകാരം കേസെടുക്കണമെന്ന് കോണ്‍ഗ്രസ് വക്താവ് രാജ്‌മോഹന്‍ ഉണ്ണിത്താന്‍. തലശ്ശേരി ഇന്ദിരാഗാന്ധി സഹകരണ ആശുപത്രിയില്‍ കഴിയുന്ന കുട്ടിമാക്കൂലിലെ അഞ്ജനയെ സന്ദര്‍ശിച്ച ശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു ഉണ്ണിത്താന്‍. സംഭവത്തില്‍ പൊലിസ് ആത്മഹത്യാ പ്രേരണ കുറ്റം മാത്രമാണ് എ.എന്‍ ഷംസീര്‍ എം.എല്‍.എക്കും പി.പി ദിവ്യക്കുമെതിരെയും എടുത്തിട്ടുള്ളത്. ദലിത് സഹോരിമാരെ അപമാനിച്ചതിന്റെ പേരിലാണ് കേസെടുക്കേണ്ടത്. ക്വട്ടേഷന്‍ സംഘമെന്നും പൊതുശല്യമെന്നും നേതാക്കള്‍ പറഞ്ഞതില്‍ മനംനൊന്താണ് യുവതി ആത്മഹത്യക്ക് ശ്രമിച്ചത്. പട്ടികജാതി- പട്ടിക വര്‍ഗ കമ്മിഷനും ദേശീയ പട്ടിക ജാതി-പട്ടിക വര്‍ഗ കമ്മിഷനും മുന്നില്‍ ദലിത് പീഡനത്തിനെതിരെ താന്‍ പരാതി നല്‍കുമെന്നും പട്ടികജാതി പീഡന നിരോധന നിയമ പ്രകാരം കേസെടുക്കണമെന്ന് ആവശ്യപ്പെടുമെന്നും ഉണ്ണിത്താന്‍ പറഞ്ഞു. ജില്ലാ പൊലിസ് ചീഫിനെയും ജില്ലാ കലക്ടറെയും കമ്മിഷന്‍ മുന്നില്‍ വിളിച്ചു വരുത്തി പട്ടികജാതി പീഡന നിരോധന നിയമ പ്രകാരം കേസെടുക്കാന്‍ ആവശ്യപ്പെടുമെന്നും അദ്ദേഹം കൂട്ടിച്ചേര്‍ത്തു. 4