മഞ്ചേരി: മോഷ്ടിച്ച ബൈക്കുമായി കറങ്ങി നടന്ന യുവാവിനെ മഞ്ചേരി പ്രത്യേക അന്വേഷണ സംഘം പിടികൂടി. കൊണ്ടോട്ടി കൊട്ടുക്കര സ്വദേശി കിഴക്കേ അപ്പാര്‍ട്ട്‌മെന്റ് ഹക്കിം റഹ്മാ (21)നെയാണ് പൊലിസ് പിടികൂടിയത്. മഞ്ചേരി, വള്ളുവമ്പ്രം, പൂക്കോട്ടൂര്‍ പരിസരങ്ങളില്‍നിന്നും കഴിഞ്ഞ ആറുമാസത്തിനിടെ നാല് ബൈക്കുകള്‍ മോഷണം പോയിരുന്നു.
ഏറ്റവും ഒടുവിലായി ഇക്കഴിഞ്ഞ ജനുവരി 21ന് വള്ളുവമ്പ്രം സ്വദേശി കൊമ്മേരി അരുണിന്റെ ബൈക്കാണ് മോഷണം പോയിരുന്നത്. ഇതുമായി ബന്ധപ്പെട്ട് പരിസര പ്രദേശങ്ങളിലെ നിരീക്ഷണ കാമറ ദൃശ്യങ്ങള്‍ പൊലിസ് പരിശോധിച്ചു വരികയായിരുന്നു. എന്നാല്‍ അതിനിടെയാണ് മോഷണം പോയ ബൈക്ക് ഒ.എല്‍.എക്‌സില്‍ വില്‍പ്പനക്ക് വച്ചിട്ടുണ്ടെന്ന വിവരം ലഭിക്കുന്നത്.
തുടര്‍ന്ന് പൊലിസ് നടത്തിയ നീക്കത്തിലാണ് പ്രതി പിടിയിലായത്. മഞ്ചേരി സി.ഐ എന്‍.ബി ഷൈജുവിന്റെ നേതൃത്വത്തില്‍ എസ്. ഐ ജലീല്‍, എസ്.ഐ ഷാജിമോന്‍, പ്രത്യേക അന്വേഷണ സംഘാംഗങ്ങളായ സത്യനാഥന്‍ മനാട്ട്, ശശി കുണ്ടറക്കാട്, ഉണ്ണികൃഷ്ണന്‍ മാരാത്ത്, അസീസ്, പി. സഞ്ജീവ്, മധുസൂദനന്‍ എന്നിവരാണ് അന്വേഷണസംഘത്തില്‍ ഉണ്ടായിരുന്നത്.