മലപ്പുറം: ത്യാഗസന്നദ്ധതയുടെയും ആത്മസമര്‍പ്പണത്തിന്‍െയും പാഠങ്ങള്‍ പകര്‍ന്ന് നല്‍കി നാടെങ്ങും ബദര്‍ദിനം ആചരിച്ചു. തിന്മയ്‌ക്കെതിരേ നന്മ വിജയം നേടിയ മഹത്തായ പോരാട്ടത്തിന്റെ ഓര്‍മകള്‍ പുതുക്കി വിശ്വാസികള്‍ ബദ്‌റില്‍ പങ്കെടുത്തവരെ അനുസ്മരിച്ചു. ഇതിന്റെ ഭാഗമായി ഇന്നലെ നാടെങ്ങും വിവിധ അനുസ്മരണ പരിപാടികളും അന്നദാനവും നടന്നു. വിശുദ്ധ റമദാന്‍ 17 ാം ദിനമായ ഇന്നലെ മസ്ജിദുകളില്‍ നടന്ന മജ്‌ലിസുന്നൂര്‍, മൗലീദ് സദസുകളില്‍ നൂറുകണക്കിന് വിശ്വാസികളാണ് പങ്കെടുത്തത്. മസ്ജിദുകളിലും അനുസ്മരണ സദസുകളിലും പണ്ഡിതന്‍മാരും ഇമാമുമാരും ബദര്‍ദിന സന്ദേശം നല്‍കി. ചരിത്രത്തില്‍ തുല്യത ഇല്ലാത്ത വിധം ധര്‍മവും അധര്‍മവും, നീതിയും അനീതിയും തമ്മിലുണ്ടായ പോരാട്ടമായിരുന്നു ബദര്‍ യുദ്ധം. ഇസ്‌ലാമിക ചരിത്രത്തിലെ പ്രഥമ യുദ്ധം എന്ന നിലയിലും ബദര്‍ യുദ്ധത്തിന് ഏറെ പ്രസക്തിയുണ്ട്.