നെയ്യാര്‍: അല്‍പ നേരം കാത്തിരുന്നാല്‍ കുട്ട നിറയെ കോള്..!നെയ്യാറിന്റെ തീര പ്രദേശങ്ങള്‍ ഇപ്പോള്‍ മീന്‍പിടുത്തക്കാരാല്‍ സജീവമായിരിക്കുകയാണ്. വനംവകുപ്പിന്റെ  നിരോധനത്തെ മറികടന്നാണ്  മീന്‍പിടുത്തം. കട്‌ല, രോഹു, ഷാര്‍പ്പ് തുടങ്ങിയവ ഇവിടെ വേണ്ടുവോളമുണ്ട്. കഴിഞ്ഞ രണ്ടു വര്‍ഷത്തിനിടയ്ക്ക് വിവിധയിനങ്ങളില്‍ പെട്ട അഞ്ചു ലക്ഷത്തോളം  മത്സ്യക്കുഞ്ഞുങ്ങളെയാണ് നെയ്യാറില്‍ നിക്ഷേപിച്ചിരിക്കുന്നത്.
മത്സ്യസമ്പത്തിന്റെ  വിപണന സാധ്യതകള്‍ മുന്നില്‍ കണ്ടായിരുന്നു  നെയ്യാറിലും മത്സ്യക്കുഞ്ഞുങ്ങളെ നിക്ഷേപിച്ചത്. നാട്ടുകാര്‍ക്ക് മത്സ്യം കുറഞ്ഞ വിലക്കു  ലഭ്യമാക്കാനും നിരവധി പേര്‍ക്കു തൊഴില്‍ നല്‍കുകയുമായിരുന്നു ലക്ഷ്യം.എന്നാല്‍ വനംവകുപ്പിന്റെ എതിര്‍പ്പ് പാരയായി. നെയ്യാര്‍ വന്യജീവി സങ്കേതത്തിന്റെ കീഴിലാണ് ഡാമിലെ വെള്ളം വരുന്നതെന്നും അതിനാല്‍ അതിനകത്തുള്ള മത്സ്യങ്ങളെയും വന്യജീവികളായി പരിഗണിക്കേണ്ടി വരുമെന്നും  അവയെ പിടിക്കുന്നത് അനുവദിക്കാനാകില്ലെന്നുമായിരുന്നു നിലപാട്. അങ്ങനെ പദ്ധതി നിലച്ചു.  ആ മീനുകളാണ്  ഇന്ന് കോളുകളായി മാറിയത്..!