തൃശൂര്‍: കരുവന്നൂര്‍ കള്ളപ്പണ ഇടപാട് കേസില്‍ മുന്‍ എം.പിയും സിപിഎം സംസ്ഥാന സെക്രട്ടറിയേറ്റ് അംഗവുമായ പി.കെ ബിജുവിനെ ഇഡി ഇന്ന് വീണ്ടും ചോദ്യം ചെയ്യും. കഴിഞ്ഞ വ്യാഴാഴ്ച്ച ബിജുവിനെ 8 മണിക്കൂറിലധികം ചോദ്യം ചെയ്തിരുന്നു. കരുവന്നൂരിലെ പാര്‍ട്ടിയുടെ കണ്ടെത്തലുകളും തുടര്‍നടപടികളും സംബന്ധിച്ച് വ്യക്തത വരുത്തുന്നതിന് വേണ്ടിയാണ് വീണ്ടും ചോദ്യം ചെയ്യുന്നത്. ബിജുവിന് പുറമെ തൃശൂര്‍ ജില്ല സെക്രട്ടറി എം.എം വര്‍ഗീസിനെയും ഇഡി ഉടന്‍ ചോദ്യം ചെയ്യും. കഴിഞ്ഞ ദിവസത്തെ ചോദ്യം ചെയ്യലിനിടെ വര്‍ഗീസിന്റെ ഫോണ്‍ അന്വേഷണ സംഘം കസ്റ്റഡിയിലെടുത്തിരുന്നു. 

കേസില്‍ മുഖ്യപ്രതികളിലൊരാളായ സതീഷ് കുമാര്‍ 2020ല്‍ ബിജുവിന് 5 ലക്ഷം രൂപ നല്‍കിയെന്ന് അറസ്റ്റിലായ സിപിഎം കൗണ്‍സിലര്‍ പി.ആര്‍ അരവിന്ദാക്ഷന്‍  മൊഴി നല്‍കിയിരുന്നു. കഴിഞ്ഞ ആഴ്ച്ചയും ബിജു ഇഡിക്ക് മുന്നില്‍ ഹാജരായിരുന്നു. ആദ്യമായാണ് ഇഡി നോട്ടീസ് നല്‍കിയതെന്നും തന്നെ വിളിപ്പിച്ചത് എന്തിനാണെന്ന് അറിയില്ലെന്നുമായിരുന്നു ബിജു അന്ന് മാധ്യമങ്ങളോട് പറഞ്ഞത്. കരുവന്നൂരില്‍ പാര്‍ട്ടി അന്വേഷണവുമായി ബന്ധപ്പെട്ട റിപ്പോര്‍ട്ട് ഇഡി ആവശ്യപ്പെട്ടിട്ടില്ലെന്നും ബിജു പറഞ്ഞിരുന്നു.