മോസ്‌കോ: റഷ്യയില്‍ പ്രതിപക്ഷ നേതാവ് അലെക്‌സി നവാല്‍നി വീണ്ടും അറസ്റ്റില്‍. തലസ്ഥാനമായ മോസ്‌കോയില്‍ പ്രസിഡന്റ് വ്‌ളാദ്മിര്‍ പുടിനെതിരായ റാലിക്കിടെയാണ് നവാല്‍നിയെ അറസ്റ്റ് ചെയ്ത് ജയിലിലടച്ചത്.

പുടിന്റെ സത്യപ്രതിജ്ഞാ ചടങ്ങില്‍ പ്രതിഷേധിച്ചായിരുന്നു പ്രതിപക്ഷ സംഘടനകളുടെ നേതൃത്വത്തില്‍ വിവിധ റഷ്യന്‍ നഗരങ്ങളില്‍ പ്രതിഷേധ പ്രകടനങ്ങള്‍ അരങ്ങേറിയത്. മോസ്‌കോയില്‍ നവാല്‍നിയായിരുന്നു പ്രകടനത്തിനു നേതൃത്വം നല്‍കിയത്. പ്രകടനത്തിന് പൊലിസ് അനുമതി നല്‍കിയിരുന്നില്ല.
അറസ്റ്റ് സമ്പൂര്‍ണമായി നിയമവിരുദ്ധമാണെന്ന് പ്രതിപക്ഷ രാഷ്ട്രീയ നേതാവായ ലിയോനിഡ് വോള്‍കോവ് പറഞ്ഞു. നിയമവിരുദ്ധമായി പ്രക്ഷോഭങ്ങള്‍ സംഘടിപ്പിച്ചതിന് നവാല്‍നി ഇതിനു മുന്‍പും നിരവധി തവണ അറസ്റ്റിലായിട്ടുണ്ട്.