നെടുങ്കണ്ടം: കഞ്ചാവുമായി ബോഡിമെട്ട് ചെക്കുപോസ്റ്റില്‍ എറണാകുളം സ്വദേശികളായ രണ്ട് യുവാക്കളെ പിടികൂടി. എറണാകുളം തോപ്പുംപടി പണിക്കന്‍വീട്ടില്‍ ഹാറൂണ്‍(20), മാട്ടാഞ്ചേരി പാലക്കാട്ടുപറമ്പില്‍ അഫ്രീദി(19) എന്നിവരാണ് പിടിയിലായത്. ഇവരില്‍ നിന്നും 250 ഗ്രാം കഞ്ചാവ് എക്‌സൈസ് സംഘം പിടിച്ചെടുത്തു.
 ബൈക്കിന്റെ സീറ്റിനടിയില്‍ ഒളിപ്പിച്ച നിലയിലാണ് കഞ്ചാവ് കണ്ടെത്തിയത്. ബോഡിമെട്ട് ചെക്കുപോസ്റ്റില്‍ എക്‌സൈസ് നടത്തിയ വാഹന പരിശോധനയില്‍ ശനിയാഴ്ച വൈകിട്ടാ യാണ് പ്രതികള്‍ പിടിയിലായത്.  
 കമ്പംമെട്ട് ചെക്കുപോസ്റ്റിലൂടെ കമ്പത്ത് എത്തിയശേഷം ബോഡിമെട്ട് വഴി അതിര്‍ത്തി കടക്കാന്‍ ശ്രമിക്കുന്നതിനിടെയാണ് ഇവര്‍ വലയിലായത്.കമ്പംമെട്ടില്‍ പരിശോധന കര്‍ശനമാണെന്ന വിവരത്തെത്തുടര്‍ന്നാണ് പ്രതികള്‍ ബോഡിമെട്ട് വഴി അതിര്‍ത്തി കടക്കാന്‍ ശ്രമിച്ചതെന്ന് എക്‌സൈസ് സംഘം പറഞ്ഞു.
സ്വന്തം ആവശ്യത്തിനും കൂട്ടുകാര്‍ക്ക് വില്‍പ്പന നടത്തുന്നതിനുമാണ് ഇവര്‍ കഞ്ചാവ് എത്തിച്ചതെന്നാണ് എക്‌സൈസിനോട് പ്രതികള്‍ പറഞ്ഞത്. ഹാറുണ്‍ എറണാകുളത്ത് മീന്‍കച്ചവടക്കാരനാണ്. അഫ്രീദി പാര്‍ക്കിങ് കേന്ദ്രത്തിലെ ജീവനക്കരാനാണ്.
ഉടുമ്പന്‍ചോല എക്‌സൈസ് സര്‍ക്കിള്‍ ഇന്‍സ്‌പെക്ടര്‍ രഘുനാഥന്‍നായര്‍, ദേവരാജന്‍,പി.ഡി.സേവ്യര്‍,ശശികുമാര്‍, ജലീല്‍,അനിഷ്, സജിത്,ശശിന്ദ്രന്‍ എന്നിവരടങ്ങിയ സംഘമാണ് പ്രതികളെ പിടികൂടിയത്.