അണ്ടത്തോട്: സമൂഹത്തിലെ അവശതയനുഭവിക്കുന്നവരുടെ കണ്ണീരൊപ്പുമ്പോഴാണ് ഒരു പൊതുപ്രവര്‍ത്തകന്റെ കടമ നിര്‍വഹിച്ചു എന്ന സംതൃപ്തി പൂര്‍ണമാകൂ എന്ന് സലാല കെ എം സി സി കേന്ദ്രകമ്മറ്റി സെക്രട്ടറിയും തൃശൂര്‍ ജില്ല കമ്മിറ്റി പ്രസിഡന്റുമായ ആര്‍ കെ അഹമ്മദ് അഭിപ്രായപ്പെട്ടു.
സമൂഹത്തിലെ അവശതയനുഭവിക്കുന്ന അനേകായിരങ്ങളുടെ കണ്ണീരൊപ്പാന്‍ കെ.എം.സി.സി യെന്നും മുന്നിലുണ്ടായിട്ടുണ്ട്.അനേകായിരങ്ങള്‍ക്ക് കിടപ്പാടവും,അസുഖങ്ങള്‍ മൂലം ദുരിതമനുഭവിക്കുന്നവര്‍ക്ക് ചികിത്സാ സഹായങ്ങളും വിവാഹ ധനസഹായങ്ങളും വിദ്യാഭ്യാസ സഹായങ്ങളും നല്‍കി സേവന രംഗത്ത് പ്രവര്‍ത്തനിരതരാണ് ഓരോ കെ എം സി സി അംഗങ്ങളും.
അണ്ടത്തോട് തങ്ങള്‍പടി ശിഹാബ് തങ്ങള്‍ റിലീഫ് സെല്‍ നിര്‍മിക്കുന്ന ബൈത്തുറഹ്മയുടെ നിര്‍മാണത്തിലേക്ക് തൃശൂര്‍ ജില്ല കെ എം സി സി സ്വരൂപിച്ച ധനസഹായം വിതരണം ചെയ്ത് സംസാരിക്കുകയായിരുന്നു.
ജില്ല മുസ്‌ലിം ലീഗ് വൈസ് പ്രസിഡന്റ് വി.കെ മുഹമ്മദ്,മണ്ഡലം ലീഗ് ട്രഷറര്‍ വി കെ യൂസഫ്,സലാല കെ.എം.സി. സി തൃശൂര്‍ ജില്ല ജനറല്‍ സെക്രട്ടറി ഹുസൈന്‍ വലിയകത്ത്,പഞ്ചായത്ത് മുസ്‌ലിം ലീഗ് വൈസ് പ്രസിഡന്റുമാരായ വി. മായിന്‍കുട്ടി,കെ ഹൈദര്‍ ഹാജി,പഞ്ചായത്ത് അംഗം കെ എച്ച് ആബിദ്,മണ്ഡലം യൂത്ത് ലീഗ് വൈസ്പ്രസിഡന്റ് പി. എസ് മനാഫ്,പഞ്ചായത്ത് യൂത്ത് ലീഗ് ജനറല്‍ സെക്രട്ടറി ഉസ്മാന്‍ ചോലയില്‍,നിര്‍മ്മാണ കമ്മറ്റി കണ്‍വീനര്‍ ഷക്കീര്‍ പൂളക്കല്‍,നൗഷാദ് തെക്കൂട്ട് സംബന്ധിച്ചു.