വൈക്കം: സിവില്‍ സപ്ലൈസ് വകുപ്പ് തയ്യാറാക്കിയ മുന്‍ഗണനാ പട്ടികയില്‍ നിന്ന് അര്‍ഹതപ്പെട്ട കുടുംബങ്ങളെ ഒഴിവാക്കിയ നടപടിയില്‍ ഉദയനാപുരം ഗ്രാമപഞ്ചായത്ത് കമ്മിറ്റി പ്രതിഷേധിച്ചു.  കഴിഞ്ഞ നവംബറില്‍ പ്രസിദ്ധീകരിച്ച കരട് മുന്‍ഗണനാ പട്ടികയില്‍ ഉള്‍പ്പെട്ടിരുന്ന പലരും അന്തിമപട്ടികയില്‍ നിന്നും പുറത്തായിരിക്കുകയാണ്. ഫീല്‍ഡ് പരിശോധന നടത്താതെ ഉദ്യോഗസ്ഥര്‍  തയ്യാറാക്കിയ ലിസ്റ്റ് അപാകതകള്‍ ഏറെയുള്ളതാണ്. ഗ്രാമസഭയില്‍ അവതരിപ്പിച്ച ലിസ്റ്റിനെ സംബന്ധിച്ച് നിരവധി ആക്ഷേപങ്ങളാണ് ഉയര്‍ന്നുവന്നിട്ടുള്ളത്.
പട്ടികജാതി വിഭാഗത്തില്‍ പെട്ടവര്‍, കാന്‍സര്‍ പോലുള്ള മാരകരോഗമുള്ളവര്‍, മത്സ്യതൊഴിലാളികള്‍, കയര്‍ തൊഴിലാളികള്‍, കര്‍ഷക തൊഴിലാളികള്‍, തൊഴിലുറപ്പ് തൊഴിലാളികള്‍, ഖാദി തൊഴിലാളികള്‍ എന്നീ പരമ്പരാഗത മേഖലയില്‍ പണിയെടുക്കുന്ന നിരവധി പേര്‍ പട്ടികയ്ക്ക് പുറത്താണ്.
രണ്ടോ മൂന്നോ സെന്റില്‍ കഴിയുന്നവരും കുടിലുകളില്‍ താമസിക്കുന്നവരും പോലും മുന്‍ഗണനാ പട്ടികയില്‍ പെട്ടിട്ടില്ല. അതിനാല്‍ ഗ്രാമസഭ അംഗീകരിച്ച അര്‍ഹതപ്പെട്ട കുടുംബങ്ങളെ മുന്‍ഗണനാ പട്ടികയില്‍ ഉള്‍പ്പെടുത്തിയും അനര്‍ഹരെ ഒഴിവാക്കിക്കൊണ്ടുമുള്ള ലിസ്റ്റ് മാത്രമേ അംഗീകരിക്കേണ്ടതുള്ളുവെന്ന് പഞ്ചായത്ത് കമ്മിറ്റി ഐകകണ്‌ഠേന തീരുമാനിച്ചു. ഇതനുസരിച്ച് പുതുക്കിയ ലിസ്റ്റ് സിവില്‍ സപ്ലൈസ് വകുപ്പിന് കൈമാറിയതായി പഞ്ചായത്ത് പ്രസിഡന്റ് സാബു പി.മണലൊടി അറിയിച്ചു.