ലഖ്‌നൗ: പാര്‍ട്ടി നേതൃത്വം കൈയ്യടക്കികൊണ്ടുള്ള അഖിലേഷിന്റെ പരീക്ഷണം അവസാനിപ്പിക്കണമെന്ന് സമാജ് വാദി പാര്‍ട്ടിയിലെ മുതിര്‍ന്ന നേതാക്കള്‍ ആവശ്യപ്പെട്ടു. പാര്‍ട്ടിയെ വീണ്ടും സ്ഥാപക നേതാവ് മുലായത്തിന്റെ കൈകളില്‍തന്നെ ഏല്‍പ്പിക്കണമെന്നും നേതാക്കള്‍ ആവശ്യപ്പെട്ടു.
2012ലെ തെരഞ്ഞെടുപ്പില്‍ 224 സീറ്റുകളുമായി മുന്നിട്ടു നിന്ന പാര്‍ട്ടി ഇത്തവണ 47 സീറ്റുകളില്‍ മാത്രം ഒതുങ്ങിയത് പാര്‍ട്ടി നേതാക്കളെ ഞെട്ടിച്ചിരിക്കുകയാണ്. നേതാക്കളില്‍ പ്രത്യേകിച്ച് ശിവ്പാല്‍ യാദവാണ് അഖിലേഷിന്റെ പരീക്ഷണം അവസാനിപ്പിക്കണമെന്ന ആവശ്യം ആദ്യമായി ഉയര്‍ത്തിയത്. പാര്‍ട്ടി നേതൃത്വം മുലായത്തിനെ ഏല്‍പ്പിക്കണമെന്നും അദ്ദേഹം ആവശ്യപ്പെട്ടു.
തെരഞ്ഞെടുപ്പ് വരെ മാത്രമേ അഖിലേഷിന് പാര്‍ട്ടിയില്‍ നിയന്ത്രണമുണ്ടായിരുന്നുള്ളൂ. അദ്ദേഹം നടത്തിയ പരീക്ഷണം പൂര്‍ണമായും പരാജയപ്പെട്ടിരിക്കുകയാണ്. അതുകൊണ്ട് പാര്‍ട്ടിയുടെ നിയന്ത്രണം നേതാജിക്ക് വിട്ടുകൊടുക്കാന്‍ അദ്ദേഹം തയാറാകണം-ശിവ്പാല്‍ യാദവ് പറഞ്ഞു.