ഹരിദ്വാര്‍: ഹെലികോപ്റ്ററില്‍ കയറുന്നതിനിടയില്‍ കേന്ദ്ര ധനമന്ത്രി അരുണ്‍ ജയ്റ്റ്‌ലിക്ക് വീണ് പരുക്കേറ്റു. വീഴ്ചയില്‍ തലക്ക് പരുക്കേറ്റ അദ്ദേഹത്തിന് ഉടന്‍തന്നെ പ്രഥമശുശ്രൂഷ നല്‍കി.
യോഗഗുരു ബാബാ രാംദേവിന്റെ പതഞ്ജലി സംഘടിപ്പിച്ച യോഗ ക്യാംപും പതഞ്ജലിയുടെ ഹെര്‍ബല്‍ ഫുഡ് പാര്‍ക്കും സന്ദര്‍ശിക്കുന്നതിനാണ് അദ്ദേഹം ഹരിദ്വാറില്‍ എത്തിയത്. ഡല്‍ഹിയിലേക്ക് മടങ്ങാന്‍ ഒരുങ്ങവെ വൈകിട്ട് 3.30നായിരുന്നു അപകടം.
അപകടത്തില്‍ ഭയപ്പെടാനില്ലെന്നും മന്ത്രിയുടെ ആരോഗ്യനില തൃപ്തികരമാണെന്നും ഇതേ ഹെലികോപ്റ്ററില്‍ അദ്ദേഹം ഡല്‍ഹിയിലേക്കു മടങ്ങിയതായും പൊലിസ് സൂപ്രണ്ട് വി.കെ.കൃഷ്ണകുമാര്‍ അറിയിച്ചു. രാംദേവും മറ്റും സമീപത്ത് നില്‍ക്കവെയാണ് മന്ത്രി തെന്നിവീണത്.